COCECURTE DAY – la clamade!

Contecurtârs e contecurtaris e contecurtar*!

Savêso ce che al è sucedût chê altre dì? Che il nestri Ostîr al è lât a comprâ un biel sac di miluçs! E bon… disarês voaltris, no nus somee un avigniment, che po a lui nancje no i plasin, ma a lis sôs copassis une vore, ma bon, o savês cemût che al è fat l’Ostîr, cul cjâf simpri plen di fastidis che al clame dongje fastidis ogni volte che si volte un grignel di polvar. In sumis… al cjale il Spaccio Raffl, e al fâs… “Eh ma ce biel grant che o vês ca… ce tant spazi…” E bon, e quindi? “Eh… a chi si podarès propite fâ un spetacul!”

Adiriture un spetacul? Par ce motîf? Nuie… cussì, tant par fâ alc. Eh o vês za capit dut. Timp trê dîs trê e il nestri Ostîr, cjalant lis bielis cocis che a jerin a vendi, al veve pensât di fâ un spetacul di contis a teme di pôre, di fâ dongje de fin di Otubar, e di fâ nuie di mancul che un Contecurte Day, ven a stâi il Contecurte Day dal 2023. In efiets, a tacâ dal 2016 lu si è fat ogni an, ancje cuant che al jere il Covid (si visaiso il CovidCurte Day?) e ancje cuant che e jere la cjarte verde (il Pôrecurte Day) e dut câs ancje tal 2022 o vin fate la gare, ven a stâi la CorseCurte, che e je adiriture durade un an. (in pratiche o vin fats 12 contecurte days). E par chest 2023 alore o vin decidût che si pues tornâ ae tradizion, la plui classiche, e meti adun la gare di contis cu la solite formule. Cuale?

Domenie ai 29 di Otubar, aes 6 sot sere, la clape di Chei Soversîfs di Contecurte e metarà in sene la disfide jenfri 12 contis, lis miôr che a rivaràn ae nestre Ostarie di chi ai 20 di Otubar (tiermin ultin e invalicabil, par podê inmaneâ lis leturis). Lis contis in gare lis sielzarà l’Ostîr, che cun di plui al sarà l’unic a savê cui che al è l’autôr de conte, stant che inte nestre gare, lu savês, e je la conte a partecipâ, e no l’autôr, che al vignarà disvelât dome inte sere dal spetacul. Lis contis a àn di jessi lungjis no plui di 2000 batudis, cence sconts, stant che e je une gare. Si che duncje, a tacâ di… CUMO’! o podês pensâ la vuestre conte a teme e sometile al judizi prime dal Ostîr e dopo, se e jentre intes 12, al public che al vignarà a scoltâ e votâ lis contis.

Eh, sì. Lu savês ben. Il Contecurte Day, dal vîf, al è decidût dal public, che al vote lis contis, e noaltris de osterie a prestìn dome la vôs. Cun di plui, a decidi il tabelon al sarà il câs, cu lis estrazions dilunc de serade. E juste par dîus che o vês di vignî, clare che o podarês ancje comprâ lis Cocis di podê fâ lis crepis pe gnot de vilie dai Sants, cuant che i muarts a vignaràn a cjatâus. A proposit… tal mês di Otubar dal nestri libri Lis Contis dal Mês o cjatais dut su cheste gnot. Par cui che no lu à al pues lâ a cjolilu propite al Spaccio Raffl, che al à ducj i libris dal Ostîr e di Contecurte.

Sù alore… In man la tastiere. Come simpri o podês spedî la vuestre conte ae nestre direzion di pueste, e se o volês cjapâ ispirazion si pues lâ a cirîle ancje in osterie, sedi ca, o pûr a ca, o ancje leint lis contis di pôre che o vin inte ostarie, che o savês nus plasin une vore, sedino di orôr, o di gjenar neri, o fantastic.

E par stiçâus ancjemò us ricuardin che o vin publicât, par cure de nestre Sartore, che e à ancje pensât il non dal spetacul (CoceCurte al è bielonon!) une schirie di conseis di scriture di int innomenade voltâts par furlan (Gadda, King, Cave, Vonnegut) o parcè di no, lis istruzions dal nestri Ostîr par scrivi une conte, lui che di contis curtis un pôc si intint.

Nus pâr di vêus dite dut. In curt e saltarà fûr la locandine uficiâl dal event e dutis lis informazions, ma intant i tignivin a fâ la clamade par cui che al à voie di partecipâ cuntune conte.

Us saludìn cuntun pocjis di cocis dal ostîr e de gjatemarangule, fatis intai agns, e ancje – simpri par stiçâus – cu la liste di cui che al è stât cetant babio di vinci i Contecurte Days dai agns passâts.