#20 – Colm di gnot
A ce pont ise la gnot, sentinele? Ghite e prove a recuperâ il rest di chês peraulis che i rivochin tal cjâf, ma il so pinsîr al è inclaudât su la flebo che e vongole parsore dal jet. Di trat in trat, perlis licuidis si distachin dal infinît par butâsi tun vueit che al tache a ingrumâ simpri plui sostance. Une sorte di clessidre pronte a decidi il so destin. Ce sucedaraial ae fin di cheste zornade glotude dal scûr?
Insom de cjamare, Fidrì al polse involuçât tes bausiis di cualchi sium. Lu à odeât, par un marilamp, lui e la sô mentalitât pratiche, lui e il so cjapâ in man la situazion, lui e il so cjalâle intai voi par sfantâ vie cualsisei sperance. Che forsit al sarès lât dut ben, forsit il mâl si sarès bonât, forsit il sanc le varès finide di spissulâ jù des gjambis.
Lui, invezit, le veve tirade sù intant che, scrufuiade intal bagn, e cirive di scancelâ la sdrasse rosse che le compagnave, le veve blocade te sô smuarse e le veve obleade a montâ te veture.
Inte corse cence timp viers l’ospedâl, cui voi che a tacavin a studâsi e il cuarp simpri plui frêt e smavît, e veve sintût Fidrì fevelâ cun cualchidun lontan. Metalic. Mecanic. Miedi. “Sta perdendo il bambino”. Cemût si jerino permetûts di dî une robe dal gjenar? Ce savevino lôr di cemût che e stave? Di ce che al sarès sucedût?
Ghite e pare indenant lis imagjins di jê cu lis gjambis viertis, dal zovin che i sgarfe dentri e si ricjate intune sale di spiete, cu la infermiere che i dîs intun rideç che nol rive a no jessi formâl: “È giovane, avete tutta la vita davanti”.
A ce pont ise la gnot, cuant che la muart di un frut e à il valôr di un refudum speciâl butât intal sac? A ce pont ise la vite, cuant che tu ti cjatis in creste su la sclapadure che e divît il prime dal dopo? A ce pont isal che il fîl ingropât dal destin al rive a tornâ a tiessi il so ricam?
Ghite e siere i voi. “Al ven dì e po e torne gnot; se o volês domandâ, domandait, mendaitsi e vignît”. Une lagrime e cor sui smursiei colôr di rose.
di Fuguline (Cjicechepicjedispicjelacite)
#1302
