Chei Soversîfs di Contecurte
L’Ostîr
L’Ostîr al è Rafâel Serafin (Raffaele Serafini), cognossût tal web tant che gelostellato, cîl glaçât di une volte e salvadeat di cumò. Rafaêl al trafiche dispès cu la marilenghe e cu la leterature. Furlan dal ’75, al insegne economie aziendâl, dirit e altris brutis robis ai fruts des superiôrs, ma i è capitât ancje di insegnâ la marilenghe ai fruts plui piçui o fâ il sportelist di furlan. Al scrîveve par furlan i cartelons par l’Udin, al lei libris par fruts, al scrîf contis curtis ancje par talian, al bute jù i pensîrs cuant che i capite, al dissegne, al piture e di sigure al fâs cualchi altre robe che cumò no si vise. Al à vût lavorât intal mont de editorie e al cîr di lei libris di ogni sorte, cuntun voli in plui par chei di contis. Par cumò al à publicât Contis di famee (2015), Soreli jevât a mont (Premi San Simon 2015), Contis sot spirt (Premi San Simon 2017), Altris contis di famee (2018), Bisest (Premi San Simon 2019), Cryptofriûl (Premi San Simon 2021), Lis Contis dal Mês (cun Serena Fogolini) e Zaraton (2023). Cuant che al pues al inmanee spetacui di contis curtis e al puarte la osterie ator pal Friûl. Al è lui che al lei lis vuestris contis, us comede alc e daspò lis publichee. Se us covente al è facil cjatâlu ae mail gelostellato gmail.
Il Famei
Checo Tam (Francesco Tami) al è un furlan dal ’63 e al è di Pavie (No, no chê di Milan…). Al è un colaboradôr di Radio Onde Furlane e al scrîf articui musicâi par rivistis e fanzines. Intal 2000 al à vinçût il premi San Simon pe narative cu La maree nere e altri contis e il prin premi intal concors pes senegjaturis dal CEC cun Viatores. Altris sôs contis a son vignudis fûr su la riviste La Comugne, dulà che intal 2002 a je stade publicade la sô senegjature Ecstasy. Tal 2002 al à publicât une opare une vore origjinâl, l’audiolibri Sense parodie des oparis di fantasience dai agns ’50. Al è ancje cjantant de gnove formazion dai Soglia del Dolore (punk band) dal 2004. Intal 2008 al vinç il Premi Friûl cul progjet Francis and The Phantoms (darkwave). Pe Kappa vu al à publicât Scûr di lune, e Disvuedant il scansel. Al à une vore di contis su cheste osterie e al è il letôr plui fidât des contis dal Ostîr e lu compagne simpri tes sôs scorsenadis leteraris…
Il Berlon
Michêl Londar (Michele Londero), ch’al sedi di Glemone si lu capìs dal cognon… Al è un furlan dal ’71 e dal 1999 al lavore come educadôr, imbastint progjets in favôr di personis cun disabilitât, par cont de AAS3 “Alto Friuli – Collinare – Medio Friuli”. Dal 2000, cun altris siei compaesans, al à metût sù la Companie di teatri amatoriâl Dreteledrôs e di chê volte al à burît fûr cualchi spetaculut, une vore di leturis e plui di cualchi cors di fonde par condividi cheste passion e par stiçasi e stiçâ chei altris a fâ i conts cun lis propis emozions. Intes robis che i plasin si bute cun morbìn, come tirâ sù ulîfs par fâ il vueli dulà butâ dentri i pevaroncins dal Ostîr, o pûr, tai ultins timps, mentintsi tal cjâf di zuiâ a rugby te scuadre dai vecjats (old) dai Black Ducks Rugby Gemona. Al à ancje scomençânt a scrivi alc pe ostarie…
La Massarie
Margarite Cogôi (Margherita Cogoi) no sa masse ben ce che e je, e soredut no sa parcè. E sa, però, che i plâs sunâ, cjantâ e balâ, fâ confusion e ancje urtiâ, e e sa che se lavoràs trop che e mangje e sarès bielzà siorissime. (Si è laureade in Siencis Internazionâls e Diplomatichis e e à cjapât il diplome di piano al Conservatori, tant par no fâsi mancjâ nuie). A seconde dai dîs e pense che la vite sedi une freadure grandonone cence sens o une fortune plene di oportunitâts. La sô pôre e je chê di butâ vie il timp, la sô passion e je di butâsi in robis e puescj gnûfs, pene ch’e po. Ancje cuant che a somein plens di int fûr cu la cassele, come Contecurte. Tant al è che ancje jê, stiçâde dal ostîr, e à tacât a scrivi…
La Sartore
Astrid Virili (Astrid Virili) di piçule le àn mandade a scuele di “cucito” e jê e veve ancje imparât, ma di grande e à scuviert che i plaseve di plui tajâ e cusî pixel invezit che vistîts. Blogarine, splinderiane, anobiane, friendfeediane, tumblerine… e a doprât scuasit ducj i socialins che a esistin, e ancje cualchidun che nol esist plui. E disin che e je une persone permalose riservade, ma se e cjate une robe che e vâl la pene e ven cun vualtris fin a Parigji.
Il Cramâr
Pablo Gortan (Pablo Gortan) al è nassût a Tumieç di pari cjargnel e mari galiziane, “libar di scugnî lâ” par tradizion ataviche. Al à vût vivût, ce tant ce pôc, a Tarvis, Udin, Padue, Mosche, Brno, Praghe, e cumò al è a stâ a Bratislave, là che al lavore cun snait e passion tal setôr dal CTRL+C & CTRL+V. No i gjavaran mai la convinzion che il viaç dibessôl nol sedi avonde, e che par sperâ di imparâ alc al coventi lâ, e po fermâsi, e po tornâ. Un tant al vâl, al dîs lui, pai libris. Al è par chest che al cjate gust inte traduzion, tirant a ciment se stes e la nestre biele lenghe, cirint di vistî di un altri sunôr (cuasi) chel stes concet; gjavant di ca e zontant di là, se al covente, a ûs di un sartôr.
La Coghe
La Fuguline (Serena Fogolini), furlane di risultive, e je vignude sù jenfri un flum e une roie, ta chei agns che lis bisatis a saltavin ancjemò dentri des nassis daspò di un burlaç e che si podeve zuiâ a distirâsi tal mieç de strade. E à vût lavorât par ents culturâi e forsit e devi vê seguît ancje cualchi progjet di ricercje, aben che no vedi ancjemò ben capît ce che e sedi daûr a cirî te sô vite. Ore presinte, e matee cu la lenghe furlane, fasint fente di vênt un pocje di cognossince. No i plâs fevelâ plui di tant e e à miôr scoltâ, soredut storiis, massime se contadis di un palc. Si lasse strissinâ des novitâts, cirint di zontâ un piç di sâl aes propuestis mataranis, ancje se dispès si sconfont cul pevar. Come ducj chei nassûts tal segn dai zimui, e à une dople muse. Cun di plui, ogni tant i capite ancje di stâ denant des senis di un teatri. Ocjo duncje a no cjapâle masse sul seri!
Il Muini
Stiefin Stefanut (Stefano Stefanutti) al è vignût su di piçul cui cjants antîcs de glesie di Aquilee e al à sunât messe par vincj agns a Madone di Graciis a Udin. Al pensave di fâ il miedi, ma nol à masse voie di masse int: si che duncje si à metût a fâ libris e a sta daûr a lis cjasis editoris. Stant che no i bastin lis cuarantedôs oris di une zornade par tignî a ment dut chel che al à voie di fâ, cuant che al mole dut al va ator pes culinis cui siei cjans. O al cjape sù la sô Nikon par tignî di cont i ricuarts dai biei moments.
Il Mestri
Zuanluche Franc (Gianluca Franco) al è… un che no si môf a mandâ une bio.
Il Sclapeçocs
Carli Pup (Carlo Puppo) al rive – di no crodi! – dal Borc dai Pups, un blec di culine poiât tra la Cividine e Telaçae, e tra Lavie e Sarsêt. Al lavore a Radio Onde Furlane che a son zaromai 25 agns ancje se, plui che no fevelâ, i plâs di scrivi. I interessin lis nazions cence stât, la narative popolâr e la storie furlane e magari par chel che, chel pôc che al à scrit fin cumò, al zire ator di chei temis alì. Al à voltât par furlan il Diari di Bobby Sands (KappaVu 2001) e al à publicât Memoriis platadis. Olmis di storie te narative popolâr furlane (El Tomât, 2007), 1511. Il Friûl de Joibe Grasse (Serling, 2011), e i libruts di contis popolârs Il re che al duar, Il frut scambiât e La nuvice incjantade (Lenghis dal Drâc, 2015). Par no restâ cu lis mans dibant, al à coordenât il Comitât 482, curât il blog Internazionalitari e scrit su La Comugne, La Patrie dal Friûl e altris rivistis. Alc di so, si lu cjate ancje te Ostarie. Al ame i boscs e i arbui, ancje se ogni tant i tocje di taiâju e sclapâju. Al sarà par chel che al à un rapuart speciâl cun manariis, massanghis e ronceis.
Il Peteçon
Alessio Ecoret (Alessio Ecoretti) furlan e soversîf dal 1996 (ma di agns pai compagns nd’à 23, pe cuesture 32). Nol è un vêr peteçon, ma lu devente pe nestre Ostarie, stant che al inzorne il nestri Instagram e se al capite ancje la pagjine Facebook, spiant a ducj, vie social, ce che al sucêt o al è sucedût a Contecurte. Pal rest, al cîr di scrivi robis e ancje se al va indenant a no jessi bon di fâ nuie, al à fat un grum di robis: il servizi civîl a Radio Onde Furlane, il zornadîr in France, l’operari dimostradôr a San Vît, il volontari intun nît in Polonie, l’autostop in Armenie e altris robis pe buine part discutibilis.
L’Archeolic
Massimiliano Ghiro (Massimilian Glîr) dal 26 Març 1994 al cres e al vîf a Teôr.
A Udin al frecuente il Liceu Classic Stellini e po dopo si lauree in Letaris Classichis. Al continue i studis in Archeologjie, vere grande passion, che lu à gafât fin dal 2009.
In di di vuê, si ilût di jessi libar. Furlan e furlanist, al scrîf cuant che al è avilît.
I Piçui Aiutants di Contecurte
Jacum e Ricart Tiburzi (Giacomo e Riccardo Tiburzio) a son aromai letôrs e aiutants de Ostarie cui lôr dissens e la presince ai spetacui, no cate cun cualchi stiçade al Ostîr par scrivi contis ad hoc. Dal sigûr, il lôr
Il Dorondon
Jacum Trevisan (Giacomo Trevisan) al è stât striât di picjul dal mont teatrâl. La sô ricercje culturâl e misclice tecnichis e imprescj diferents. Al è atôr e cjantant in un grum di spetacui in lenghe taliane e furlane, vignint ancje dret di G. De Monticelli, F. Fantini e G. De Luigi. Tal 2010 Dall’alto, spetacul sul cjampanîl di Codroip, al è stât il so debut come dramaturc e regjist. Come scritôr al à publicât contis tant par talian che par furlan. Di doi agns in ca al met adun test e regjie da la Sacre Rapresentazion de Passion di Cicunins di Feagne.
La Bibliocheche
Si puedial vê une Ostarie di Contis cence une daûr dal bancon che si intint di libris? No ve po! E alore o vin Madalene Cogôi (Maddalena Cogoi), la Bibliocheche
La Cjantore
Ma in Osterie, une biele frute che e cjante ben, intes ocasions spieciâls, no pues mancjâ, e miôr di Marte Savorgnan (Marta Savorgnan) no si podeve cjatâ.
La Gjatemarangule
Cuant che o fasìn i spetacui, si smenteìn simpri di fâsi lis fotografiis o di puartâ i ogjets de senografie o ancje di pensâiu… Une Gjatemarangule (Giorgia Gallerio) e je la soluzion a chest probleme.
Il Cjantôr
Bizio Citòs (Fabrizio Citossi) al è mieç dai Rive no tocje, che daspò al deventât Autostoppisti del magico sentiero e al è il prin a vê metût dentri un pocje di musiche live, cu la sô ghitare, intai events de Osterie. Al è l’autôr di un viers memorabil come Sêstu mai stât a Cjasottis, imni morâl de nestre Ostarie.
Il Poete
Il Polente (Franco Polentarutti)… furlan dal ’65, al è nassût e al vîf a San Zorz (di Noiâr), al declame i siei viers scalembris cui Rive no tocje e cui Autostoppisti del magico sentiero e cualchidun lu podês cjatâ te racuelte Polente against the machine. Par savê alc di plui, ve ca ancje un video dal tubo. Par noaltris i capite ogni tanti di vignî a declamâ viers, ma plui di spes di fâ onôr ai ghiringhei, in maniere plui che soversive.
Chei di Contecurte di une volte
La camarele, Lussia di Uanis (Lucia Pinat), letore intes grandis ocasions. Lussia a jè di Joannis ma vîf a Mortean. Lussia a jè cumò in orbita in the sky with diamond parsè che si à inamorada. Lussia a jè mari di doi gavanei. Lussia lavora di tancj agns cui fruts ator pa regjon e inaltrò… scrîf spetacui e puisiis. Lussia pitura monts, lei libris e contis a vôs alta, pa radio, pa lis stradis, Lussia a jè una Trastolona. Lussia à partecipât a diviars Poetry Slam e a’ nd à ancja organizâts un Trê. Lussia à vût il plasê di colaborâ cun tancj musiciscj, in particolâr, à vût doi grops che la acompagnavin ta la letura des sôs poesîs: K’Ramar e Eletrike Skeletriche Poetiche. Lussia à fat tantis voltis pardibon la osteade (gestiva un osteria in montagna tai periodos di feriis di ches altris. Lussia fâs part da SottanePoetiche… un grop di feminis creativis. Lussia ancjemò no sa se che fasarà di granda.
L’Ostîr in seconde, Dree Venier (Andrea Venier), copari dal Ostîr e chel che al metût lis fondis dal prin storic blog su Splinder. Pari dai gnognosaurs e di un sac di altris robis.
Gianfranco Pellegrini (Garzon), Sandri Carrozzo (Camarîr), a son colaboradôrs che a àn judât a meti inpins Contecurte, cun ideis, gnovis, lezions di lenghe e leterature e contis. Pa cumò a son in feriis, ma cuissà che no tornin dongje… Intant, intes contis, tai stuzighets e tai imprescj, a si pues lei ce che a àn scrit par la nestre Ostarie.
Chei chei a dan une man
Gian De Steja Al è un sflacjon passionât di grafiche digjitâl, ma al à rivât a cjatâ il timp di regalâ a cheste Osterie il banner e cualchi sbit di grafiche. Se us ves di coventâ lu cjatais sul so blog, Dio disse Kung.
Marcello Marangone Al à regalât ae ostarie una schirie di fotografiis che a ricuardin ducj i zûcs di une volte, ma fats zuiâ ai fruts di cumò.
Laurin Zuan Nardin. Contecurtâr dai plui fidâts, al jude scrivint pe rubriche dai Lets in Ostarie, stant che no dome di scriture al vîf il scritôr,