Pôrecurte Day- La Croniche

Ben po… O vin cetantis robis di contâ, di chest Contecurte Day di pôre che si è davuelzût sabide stade, a Codroip, che no savìn di dulà scomençâ e di sigure o dismentearin cualchidune. Ma insome… cirin di contâus il plui pussibil de serade, par cui che nol jere e par cui che al jere, ma al à gust di visâsi alc o discuvierzi cualchi alc che al è sucedût daûr dal bancon.

Scomencìn cun dîsi che o vin vût a disposizion une sale maraveose e ben atrezade, come che mai nus jere capitât inte storie di contecurte (graciis Pierina!). Microfons, palc, imprescj, television, puest… nol mancjave nuie. E noaltris, che se o podìn o sin ben contents di doprâ dut, o vin sfrutât cheste ocasion implen. Sì che, o vin fat jentrâ in Ostarie une gjatemarangule e chê, cun pocje spese e il furniment dal Ostîr, e à metût adun une senografie bielonone, in teme cul periodi e cui argoments des contis. Ve chi une fotografie che us mostre il palc prin di tacâ, dulà che a fasin biele mostre lis cocis dal Ostîr, che dopo a deventaràn nuiemancul che protagonistis:

Po dopo, la Sartore, in bande di meti adun la direte facebook, e à metût adun une schierie di imagjins cul titul de conte par creâ une atmosfere adate dilunc de leture, cence fâ spoiler, ma judant cui che al scoltave a jentrâ tal clime. E la robe e je ben jessude, ma ve che us mostrin ancje une imagjin di une leture, cussì podês judicâ voaltris:

Cjalait ce bon che al pâr il Berlon, vistût di pizighet, devant des Pioris e pôris de conte.

Ma no je finide chi. Il colp vincent al è stât chel di reclutâ lis ConFusione, che a sin son ocupadis di musicâ l’intro des contis e a àn fat un lavôr superlatîf. Cu lis lôr cjatadis sonoris, prime di ogni conte, la serade e je stade lizere, cence che si sintìs il pês di masse leture e cuasi dôs oris di spetacul a son svoladis vie come nuie. Podopo sigure, par un pêl o levin a risi di pierdilis, stant che la massarie si jere smenteade a cjase un toc de tastiere, ma un agnul al à ben pensât di socorile (gracie Vanessa!) e salvâ la musiche dal Pôrecurte Day.

Velis chi, Marte, aromai deventade la cjantore di Contecurte, e la Massarie Margarite, prontis par sunâ e cjantâ, e ancje a lei, stant che ducj noaltris de Ostarie aromai o sin multitasking. E in efiets, un bon esempli, al è stât l’Ostîr, rivât dret dal cimitieri, a tichignâsi cul zimul dal pizighet (o almancul cussì le à contade Michêl), lât a presentâ la serade (de Argjentine lu àn za definît il gnûf Amadeus) fintremai a pronunziâ la frase “Stop al telefoto”, e za che al jere ancje a lei cualchi conte.

Ma viodìn di rivâ ae cronache de gare. Il schema aromai lu savês. lis contis si sfidin a grups di trê, par sorteç, e dome une e rive in finâl, a seconde dai vôts dal public. O cjatais dut te biele lavagne che e à dissegnât vie vie la gjatemarangule:

Lis contis che si son sfidadis, cui autôrs, a son chestis (in nerut chês in finâl):

1- Ce che al reste, di Checo Tam (lete dal Berlon)

7- Frêt, di Massim Furlan (lete dal Ostîr)

11- L’omenon, di Milio dai cjans (lete de Sartore)

______________

5- Savoltât, di Zorz Cesaratto (lete dal Berlon)

4- Into the blue, di Noemi Salva (lete dal Ostîr)

3- La sbigule, di Marisa Gregoris (lete de Sartore)

_____________

8- Pôris e pioris, di Margarite Cogôi (lete dal Berlon)

10- Mari di Rafaêl Serafin (lete dal Ostîr)

9- Margarite, di Gianluca Franco (lete de Cjantore)

______________

6- Sta a cjase!, di Laurin Zuan Nardin (lete dal Berlon)

2- La pôre e je fate di nuie, di Pierina Gallina (lete de Massarie)

E in finâl, e à meretât la vitorie “Sta a cjase!” la conte di Laurin Zuan Nardin, che al è rivât a messedâ ironie e realtât, plasint a ducj, une vore judât de leture maraveose dal Berlon. Il popul al à decidût, come che si conven a ogni Contecurte Day.

Ma se o crodês che e sedi finide chi…

E no, parcè che framieç de finâl, dulà che a àn podût votâ ancje cui coments su fb di cjase, o miôr, de Argjentine, si diseve, framieç des contis al è stât timp ancje par une lotarie. Une lotarie dulà che, inovatîfs come simpri, o vin decidût che i premis a son stadis lis cocis de senografie, fasint ducj contents, fûr che il vincidôr, che si è vuadagnât une super coce di passe 10chilos, e une marmelade di cocis, a lui che no i plasin tant lis cocis. Ma si sa, e je la glorie e la gjonde, che a contis, di chês o vin vudis ducj.

Altri? Vino di contâus de epopee dal mac di flôrs intal sgabuzin? O vino di contâus des corsis fatis par rivâ a scomençâ in timp? O de mari dal Ostîr che si è rabaltade pes scjalis? O dai biliets de lotarie, che a àn vût milante aventuris par podê jessi tirâts fûr de coce dai Piçui Aiutants di Contecurte Ricart e Jacum, ancje lôr pronts a dâ une man? Nuie… no covente contâ dut. Nus pâr une croniche avonde buine. La serade e je stade cence dubis fra lis plui bielis seradis che o vin metudis adun e nus somee propit che ducj si son divertûts… a scomençâ di noaltris de Ostarie!

 

2 coments On Pôrecurte Day- La Croniche

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît