Margarite

Margarite e je distirade sul so jet. E scribice suntune pagjine blancje di un diari. Une dediche di meti jù, prin di tornâjal a la sô amie dal cûr. Pal moment e je dome la date.
E je di bessole in cjase. Pari e mari ducj i doi vie. E no i sucêt dabon mai di restâ bessole ta chê vilute tal mieç dai cjamps. Un stradele strete e lungje al è l’unic troi par rivâ su la statâl.
Te lûs indeule dal parelum dal comodin la pene e lasse une sdrasse lungje sul sfuei blanc intant che jê e cîr lis peraulis di scrivi. In chel e sint un rumôr di pas. Cualchidun che si svicine a la cjase. Il parelum sul comodin distudât a colp, par istint.
La persiane dal barcon de sô cjamare e je rote. La part di sot e je un tic par sbighet, e fra une steche e chê altre al è un pêl di aiar. Di une di chês fressuris Margarite e spie cualchidun che al passe denant dal barcon. E rive a lampâ dome une strisse. Une sdrasse di cjamese a cuadris. Il cûr in bocje che i poche sburît. La figure si inten un lamp, po si slontane bande la statâl.
Cui saraial stât?
Margarite e sint il sanc pompât a plen che i poche tai timplis. O Diu gno. Ma no à timp di pensâ che e sint a svicinâsi su la stradele un auto. I ferâi impiâts che a slusorin par un lamp la sô persiane. L’auto si ferme juste fûr de sô cjamare. Il cûr za cuietât al torne a galopâ. Traviers la sfese de persiane e smire cualchidun che al remene tor dal garâs.
Ma ce vuelial fâ?
Une altre ombre e travierse la stradele. E sbisie cu la cruchie de puarte di cjase. Margarite e sbalce.
E cumò?
E spessee a butâsi intal jet, e scomparìs sote dal covertôr. E sint il piulâ de puarte di cjase che si vierç. Cualchidun al ven dentri. Lu sint a rivâ fin li de sô cjamare. La puarte che si vierç a planc. Un coni di lûs che al pete dentri. Une man sul covertôr. La man ferme che cencene.
Po il covertôr al svole in bande.
Ahhhhhh!
Pari e fie si berlin su la muse.
Margarite e cuche a ret dal pari une femine mai viodude altri. Po ducj i doi a fasin intun: — Ce fâstu ca?

di Gianluca Franco
#1137
Conte cjolte dal Pôrecurte Day 2021

1 comment