ScueleCurte: I compits di Otubar

Otubar al è za passât di un sbit, e il prin dal mês, a son saltâts fûr puntuâi i compits, o miôr, lis ispirazions dulà sielzi une par scrivi la conte dal mês di Otubar. I nestris students lu savìn ben che a son sveâts, ma o vin gust di condividi cualchi gnove su la fin dal prin mês di Scuele e sui compits par il chest.

Duncje… Jessint finît cun Setembar e il timp par iscrivisi a Scuele, o podìn disvelâus che in dut o vin 32 arlêfs che a ciraran di rivâ insom a la gare scrivint une conte par ogni mês. E cuasi ducj al somee che a vedin rivât a fâ i compits dal prin (31 su 32), stant che o cjatais lis lôr contis za sul sît, e che o varês magari ancje za letis, stant che i prins a àn scrit subit e la ultime conte e je stade metude sù vuê matine (Il Dirigjent al è simpri une vore impegnât cun Consei, Collegjos, Riunions e Momenti Conviviali e vês di perdonâlu se no us rispuint subite).

Par comoditât, se si vûl scjamâ Lis Contis di Setembar in un comut pdf, fracait sul leam.

Une robe biele che o podin disvelâ, cumò che o vin dute la classe uficiâl, i sorenons di gare dai nestris students. Veju ca:

Ash Ketchum, Bepi Rimpìn, Bilo Balute, Buono Legnani, Cain, Cinoc, Cjandelîr, Cocâl di Lagune, Conastri,
Cueipiçul, Demetrio dal Bec, J di cûrs, Justizie par Franti, Lady Scriç, Libare, Madam Strafuei,
MarliUti, Milio Zupet, Mus, NIN-A-BAS, Nine, OrsRos, Papine Montessoriane, Petardo, Petaròs, Piçul Uciel
Pucefadie, Richetto, Ruspiôs, SbrindulSbrendul, Sfuéime, Soresere.

E a pene che o varin i vôts dai professôrs, che in curt a ricevaran lis contis, o disvelarìn ancje cui che al à scrit ce robe. Ancje se come che o savês, la identitât di students e professôrs e vignarà disvelade dome ae fin dal an (scolastic). Ce altri dî… Il Dirigjent Scolastic, che si cjape la incarghe dal vôt di condote, nol saveve ben cemût dâ cheste votazion, ma cumò al è rivât adun: timp che je stade mandade, lungjece de conte rispiet al limit di 2000caratars, adatament ae materie sielzude e numar di falopis di grafie di comedâ. Se un al à mandât la conte te prime setemane, in teme, sot dal limit e cence tantis falopis al à cjapât 10 in condote. La piês votazion e je par cui che al à mandât la conte la ultime, o adiriture in ritart, sforant di caratars, plene di falopis di grafie e adiriture cence sielzi nancje la materie. Al cjape 6,5 in condote. Ven a stâi che stant che professôrs che a votin a son in 10, in pratiche il risultât de condote al conte une vore pôc.

Ma cumò anìn a viodi cuai professôrs che us àn regalât lis ispirazions pal mês di Otubar!

LENGHE FORESTE

Duncje, la grande gnove e je che il Dirigjent al à cjatât il docent de catedre di Lenghe Foreste. Il professôr o la professore V. G. (che a sedin lis iniziâls? che si clami Vigji? No si sa) al je jentrât in servizi propite tai ultins dîs di Setembar, cjolt dret des graduatoriis de materie, e al à rivât (graciis!) a proponi i compits dal mês di Otubar contant dal libri di Matteo Bellotto “Di terra e di vino”. Si fevele di Friûl di une volte, e te ispirazion o cjatais ancje un sbrendul di poesie che e pues tirâ dongje tantis ideis.

FURLAN

Il prof. di Furlan P. K. par chest mês nol à abadât a spindi. Nus à scrit un articul su dute la bibliografie di Franc Fari, che nus mostre cui che al è, di ce che si ocupee e cuai che a son i libris plui impuartants che al à scrit, dutcâs dute robe che e zire ator al cjâf, massime il cjâf dai furlans. Une teme impuartant, profont e une vore plen di cantins. Ancje se no sielzeis cheste materie, us consein di lei l’articul, parcè che pardabon al merete jessi let.

ART

Prime lezion di ART, dulà che il prof. N. S. nus spieghe e mostre une opare dal mestri Alfredo Pecile che al rapresente un mus. Ancje ca, i amants de art a puedin ispirâsi a la bestie, ma ancje a dute la poetiche visive di Pecile. Cui che no lu cognòs al à une buine scuse par cognossilu! Come prime lezion nus somee che si presti a une interpretazion una vore ampie e plene di sfumaduris.

MATEMATICHE

No savevin ce spietâsi dal professôr di MATEMATICHE, che di sigle al fâs A. F., e lui nus à lassât a bocje vierte. I matematics forsit a savaran di ce che si fevele, ma il Dirigjent, che pûr la matematiche e je une materie che al insegne, al à vût cualchi fature a comprendi il teme, ancje se dopo al à capît che bisugne cjapâlu in maniere… largje e poetiche. Di ce fevelino? Ma clare, di Numars Transfinîts. E par cui che al sarà bon di scrivi una conte a teme… bon, al è za bulo!

GJEOGRAFIE

Ancje ca o vin una ispirazion une vore largje. La GJEOGRAFIE e cjacare, si sa, di Friûl e di ambient, ma chi si va oltre. D. B. nus spieghe alc di prlui a fonts su la zone colinâr furlane plui innomenade e maraveose, sedi pai vins, sedi pe bielece. Si pues declinâ pardabon la conte in riferiment al ambient naturâl, al vin, ai prodots de tiere, ma ancje ae bande plui sientifiche… In sumis, o vês ce sielzi, se scrivês par Gjeografie.

GJINASTICHE

Duncje… Il Dirigjent Scolastic, lu savês, al nol è tant a puest cul cjâf, e pe materie di GJINASTICHE al è lât a cirî un dipendent, R. Z., ancjemò plui fûr dal vade di lui. No si saveve ce che al saltave fûr di cheste materie e se l’obietîf al jere la imprevedibilitât, ben po… Mission Accomplished! Tornait indaûr al timps dai romans, o almancul al 1994, cul teme de Rievocazion storiche de corse cu lis bighis. E si fevele fi fâ gjinastiche, eh…

BUINE SCRITURE A DUCJ I ARLÊFS DI SCUELE CURTE!