1 di Otubar dal 2026

ScueleCurte_Gjeografie10: Un segrêt platât sot dai pîts

Cjaminant jenfri lis vîts dal Cuei, si capìs che chês culinis no son dome bielis: a platin, di fat, une storie une vore plui antighe di chê dai oms.
Il Cuei furlan si cjate tal Est-SudEst dal Friûl, inte provincie di Gurize, sul confin cu la Slovenie, dulà che il paisaç al continue inte regjon de Brda.
Al è un teritori di culinis delicadis, in gjenar no masse altis, sacomadis a gradons coltivâts a vîts, i roncs, alternâts cun boscs, cjasis di campagne e piçui paîs.
Al baste sbassâsi e cjapâ sù une manade di tiere par scuvierzi il vêr segret dal “Collio“.
Chê tiere grise, friabile, che si disfe jenfri I dêts, e je la Ponche, la tiere tipiche di chestis culinis. Tiere che e conte une storie di no crodi: di fat, dilunc l’Eocen, cirche 50-55 milions di agns indaûr, dulà che vuê o viodìn culinis cun filârs di vîts gropolosis, al jere une antighe val marine.
Cul timp, si son depositâts sul so fondâl savalon e pantan; I moviments de Tiere e la formazion des Alps a àn, po dopo, trasformât plan plan chescj sediments in crets.
Cussì e je nassude la Ponche, tiere fate soredut de alternance di marne e arenarie. Ancje vuê, cuant che il cret al ven fûr e si sfante sot de ploie, dal aiar e dal soreli, al cree une tiere siore di elements minerâi e cetant adate a la coltivazion de vît.
Al è dificil no pensâ che, in cualchi maniere, dentri di chês vîts al sedi restât alc dal antic mâr.
In plui, un altri element al rint chest teritori speciâl: il clime! E chest parcè doi monts che a somein lontans si incuintrin propit chi: a Nord lis Alps Juliis che a parin lis culinis des corints plui fredis; a Sud, a dome cualchi desene di chilometris, l’Adriatic che al mole fûr l’aiar plui cjalt.
Jenfri monts e mâr al nas cussì un particular ecuilibri climatic, cun ventilazion e escursions termichis che a favorissin il madurî de ue e la sô bontât.
Forsit al è propit chest un dai segrets dai vins dal Cuei: l’incuintri tra tiere, clime e … clâr, il savê e la esperience dal om.
Cussì, cuant che e rive la Serade, la vendeme e insiore ancjemò di plui il paisaç.
Fintremai de buinore la fumate, tal so spetacul plui inmagant, e involuce lis valadis lassant culinis e vignâi come a nadâ parsore di un grant mâr blanc.
Po, cui prins rais di soreli, il paisaç al torne plan plan a fâsi viodi e lis vîts, che par mês a son someadis cidinis, si jemplin di int, suns e profums.
Jenfri i filârs si sintin fuarpiis in vore, ridadis di amîs; tal aiar si misclicin il profum dolç de ue, chel de tiere umide e l’odôr fuart dal bosc.
I raps, une volte taiâts, a vegnin puartâts sul cjar e dopo in cantine par deventâ cussì most e in pôcs mês vin, il bon vin dal Cuei.
Daûr di dut chest al è il savê di gjenerazions e gjenerazions di roncârs che a àn imparât a lei ogni bâr di tiere, ogni rai di soreli e ogni soflade di aiar e, cjalant il cîl, a spietâ il moment just par vendemâ.
Il “Collio”, dutcâs, nol è fat dome di cuei, vîts e vin… ma al è ancje une tiere di confin, dulà che par secui si son incuintrâts lenghis, culturis e stories diferentis.
Chi un troi al pues vierzisi suntune suaze che e je di doi Paîs diferents, che, dutcâs, a condividin tradizions, savôrs e memoriis.
Par chest un paisaç nol è mai dome ce che o viodìn: daûr di une culine a son milions di agns di storie de Tiere; daûr di un vignâl a son il lavôr e I ricuarts di tantis gjenerazions; daûr di un confin a puedin jessi incuintris, separazions e memoriis.
E alore, la prossime volte che tu cjaminarâs jenfri i filârs dal Cuei, prove a fermâti un moment a scoltâ: ce contie la culine? Forsit dal mâr che une volte al cuvierzeve cheste tiere? Forsit di un roncâr di cent agns indaûr? Forsit dal segret di une vecje vît plantade denant di chê cjase aromai bandonade?
Salacor …