Savoltât

Gnûf apartament, gnove citât, e l’amôr scuvierzût in Ana. De bande de puarte di ingrès, al jere un vecjo spieli, cun urdiduris di finissime decorazion. Un bredul lu mantignive sul mûr. Si sin braçolâts cjalant feliçs lis nestris imagjins. Al sarà decorazion da cjamare, e disè jê. O tornai a fâi i compliments par vê cjatât chest puestut.
Tirade dentri la ultime des scjatulis o soi restât a preseâlu, cun i siei bielissims simbui.
Chê gnot mi soi insumiât cun piçulis sferis di lûs che mi cjapavin par tocs, consumantmi dai estrems. Mi à dismot un rai di lune intal veri.

Di chê dì, il sium si ripetè. A voltis lis sferis di lûs a cjapavin la forme di dincj, altris chês di piçulis musis.
Tai dîs che a vignirin mi sintivi strani, assent, savoltât. O fasevi fadie a mantignî atenzion, mi sintivi slontanât da dut e ducj. O jeri un ent cence volontât. Impussibil platâ il gno stât.
Ana e insistè di lâ a viodi un miedi. Plui par lassâle trancuile che par convinzion,o acetài.

La gnot prime, o passài devant dal spieli cuant che la lune lu inluminave. Dentri o viodei lis sferis dai siums. A ziravin in cercli. Di sferis a passavin a jessi dincj e daspò musis par po tornâ sferis. O scuvierzei inalore che ce che mi capitave al vignive di chel ogjet maladet.

Furiôs, o cjapài il bredul par butâjal cuitri. Ana mi fermà il braç par aiar zigantmi de male fortune, che al jere miôr spietâ tal indoman par lassâlu sul marcjepît.
Mi disè di cuietâmi, mi sentà tal jet, si metè a man drete, mi figotâ. O scomençài a sintîmi plui calm. Inalore mi cisicà dolce te orele: “Sâstu… tu mi âs fat inrabiâ”. Di bot mi visai che jo o viodevi come che jê mi cjareçave e che e jere a man çampe. Mi inacuarzei ancje che lis sôs mans a jerin ledrosis.

O volevi urlâ ma za no vevi plui vôs.
Cun l´ultin fregul di sintiment, e jentrant tal cercli di lûs o ridei: chest al nol jere il gnûf inizi che o pensavi.

O foi tirât dentri dal spieli.

Par simpri.

di Zorz Cesaratto
#1133
Conte cjolte dal Pôrecurte Day 2021