Into the blue

Dut il so mont a jerin i siei pîts. Ju cjalave movisi parsore il neri, un denant di chel altri, cence polse. Ator ator al jere dut grîs. Il cidinôr i berlave tes orelis, rabiôs.
Il zâl al jere rivât planc planchin, al bateve tant che un cûr. Al menave simpri di plui. Il cidinôr al jere scjampât, spaurît dal rumôr. I siei pîts a àn scomençât a movisi di mancul. Cuntun lament di animâl ferît ancje il rumôr al jere lat vie. Dome chel cûr zâl di lûs al bateve. Ae fin, fermâts i pîts, e veve alçât il cjâf par viodi une muse foreste che e fevelave, ma jê no capive nuie. Si è sintude colâ tal neri.
Al jere stât il clip a sveâle. Ator dut al jere blanc. Une fantate i veve cjapât la man, zentîl. E si è sintude colâ, cheste volte tal blanc. Daspò li vôs, a jerin un grum di lôr, vistûts di blanc. Le cjalavin e a fevelavin tra di lôr. Strache e veve sierât i voi.
Cumò al jere un fantat a fevelâ. Al voleve che jê si jevàs, i à lassât fâ. Ancje lui al jere zentîl.
Le fasevin cjaminâ ogni dì di plui, cul fantat, difûr. Ator a jerin des cubiis, un vistût di blanc, come jê; un di celest, come lui. A ziravin sot il clip dal soreli.
Une matine il fantat i veve puartât robis scuris di metisi. Une peraule e jere vignude dentri dal so mont: Blu. A son lâts fûr e ducj a jerin di blu. Il fantat le à menade pe man par jentrâ intun cjossul che no cognosseve. Cuntun rumôr, l’argagn al è partît. Cun voi spalancâts e à viodût il mont a movisi. Strache ju à sierâts fin che dut al è tornât a cuietâsi.
Il fantat le à cjapade pe man par puartâle fûr, cui altris. Cjalant di sot e à viodût i siei pîts fondâts ta un zâl che nol jere fer. Ducj discolçs, a segnalavin legris alc lontan.
Cuant che lu à viodût e à scomençât a cori, gjavantsi scarpis e vistîts. Crote, cui brâcs viarts, i coreve dongje. Cuant che i pîts si son bagnâts è à lassât chest mont cuntun salt.
Si è zirade par saludâ il fantat che al veve la aghe fin tai zenoi cun la bocje viarte, ma cheste volte finalmentri cidin.
Cuntun colp de code e tornave a cjase sô, tal blu profont.

di Noemi Salva
#1132
Conte cjolte dal Pôrecurte Day 2021