CorseCurteLui#21 – Pantan

#21 – Pantan

15.998, 15.999, 16.000.
Carli si concêt une polse prime di butâsi di gnûf inmuel ta chel oceani infinît di numars. La zornade e sarà inmò lungje – simpri che al vedi sens fevelâ di dì e gnot plantât ta chel budiel di tiere – e a lui no i reste che contâ il timp che lu divît de dismentie dal sium. Secont su secont, ingrumant minûts, oris, cence vê plui idee dai dîs, dai mês, forsit fintremai dai agns passâts in chês cundizions.
Puedie pardabon une gote rivâ a creâ ducj chei forans e landris inte piere? Carli si domande trops foradôrs che a vedin za sgjavât te sô vite. Si puedial lâ ancjemò plui insot? Ancje se nol fâs plui câs aes pachis, ai tais, ai agagns che a cirin di fâi sintî lis dibisugnis dal cuarp, al sa di jessi deventât la fantasime di se stes.
Purpûr, al veve cirût di scombati, prime di finî dentri di chê bare di pantan. Si vise ancjemò des cjadenis, des pantianis, dai rais che a travanavin la scuretât. E de aghe. Une montane di aghe rivade bot e sclop a jemplâ la sô prime preson intal cret. Si vise dai berlis, dal scatûr mai provât prime, de pôre de muart. Une pôre che cumò e je deventade une brame. Come cuant che i àn poiât il curtìs sul smursiel, menaçantlu di taiâi vie une orele, e lui al à preât che la lame e metès fin a dut.
Dal rest, al è clâr che nol tornarà libar. Jal àn dit ancje lôr: chel fi di putane di so pari nol à chê di paiâ. Di cualchi timp no vegnin nancje plui a puartâi di mangjâ. Forsit lu lassaran murî li dentri. Cuissà se a cjataran il cuarp. Cuissà se il bastart al metarà i bêçs pal funerâl.
16.001…
Carli no si inecuarç des ombris parsore de buse, no si rint cont dal vosâ. Mans discognossudis lu tirin fûr de tombe, la lûs e rive tant che un manledrôs. E je ore, al pense. Al spiete la scurtissade, un colp di pistole, cualsisei mieç che al metedi fin ae sô agonie. Ma nol sucêt nuie.
Al intraviôt la monture di un carabinîr e, plui inlà, la muse odeade dal vecjo. Lagrimis cjaldis si spieglin tai voi di pari e fi. E je finide.

di Fuguline (Cjicechepicjedispicjelacite)
#1330