Lis Metamorfosis

Cuant che e je rivade la pandemie dal vincj o soi deventât gjat. Il virus nol passave dai oms ai gjats e cussì mi soi salvât. Durmî sedis oris in dî e tignî net il pêl al jere avonde facil, plui dificil cjapâ un surisin.
Par fortune la mê vissine e lassave simpri une scudiele di vanzums de cene fûr de puarte di cjase, par i gjats vagabonts.

La robe e je lade indevant cussì fin che i sienziâts no an cjatât la vacine e la cuarantene e je finide. Ducj chei che a jerin restâts sierâts in cjase a tornavin a cori plui di prime: a vore in palestre al ristorant a fâ fieste… I fruts a tornavin a scuele e a zuiâ… simpri di corse. E jo? Cjalâ il soreli, lis fueis, lis besteutis, al jere deventât un lus che i oms no podevin plui permetisi. Ma aromai o soi usât cussì, e o soi restât gjat.

Un biel gjat neri che al à vivût cussì par vincjevot agns… Dai e dai o ai ancje imparât a cjapâ lis surîs! No capìs plui tant ben il lengaç dai umans, ma mi pâr che cumò a fevelin di une gnove pandemie: il virus al à mudât e al passe ancje dai oms a lis bestiis. La uniche salvece e je chê di mudâ une altre volte, ma cemût?

Par deventâ arbul nol baste restâ fers, come che si ves lis lidrîs. Un om al pues sielzi di restâ tal stes puest par une vite, ma al sa che se al volès al podarès lâ vie. Par deventâ lidrîs bisugne sintî che chest al è il to puest e fûr di chest nol esist nissun altri.

Lis talpis? No mi coventin plui. Baste distirâlis tal cîl e lassâlis movi dal aiar. Se e ven burascje, lassâlis pleâ e sdrondenâ, cence resisti.
Lassâ passâ l’aiar jenfri i pinsîrs, straviersâts de lûs come fueis, cence pensâ plui a ce che a vuelin dî… Planc planc si devente verts e fins come risclis di pin.
La ultime robe e je la piel: no sintî plui il cjalt e il frêt, ni brise che e cjarine. Infissîsi, deventâ penç come une scusse. Cumò il bosc al è la mê cjase.

Son za doi dîs che chest pic al talpuce sui miei ramaçs. Al svole sui arbui dongje, ma dopo al torne ca di me. O crôt di plasêi. Forsit doman al tacarà a becâmi par fâ il nît. Sot la scusse frescje il gno cûr al bat ancjemò: fasaraial in timp a deventâ len?

CovidCurte day 20 – Conte nr. 1
#961

4 coments On Lis Metamorfosis

  • E dopo la bielissime Conte dal Mês di Avrîl vuê o tachin lis publicazions di cheste edizion speciâl dal Covidcurte Day! Par dodis dîs us metarin une conte in dì, che si pues lei achi sul sît e ancje scoltâ contade di un dai personaçs de Ostarie. La prime e je intitulade Lis Metamorfosis e e je lete nuiemancul che dal Ostîr di Contecurte!

  • Biele le idee di ciatâ rifugj sot la piel di un gjat, pûr di no jessi intai agns quarante, cuant le fan e sparfumave le cusine par vie di chel arost a cuei intal fôr dal spolert. Jesus Mari cuisà tropis maludizions che mi mandin cumò, ma puar Meni Scansie lu disè simpri ” Che le fan justifiche i mieçs” ce veiso di fa, storie je storie, e le veretât no si cambie, sperin che no torni. Lussian

  • Pingback: CovidCurte Day 20 – La Disfide | Contecurte ()

  • Pingback: CovidCurte Day 20 – La Croniche | Contecurte ()

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît