Hamar

Sentât su chest rivâl o cjali sot di me la splaze de Zurriola, la bocje dal Urumea e – plui innà – la mont Urgull e la isule di Santa Klara. O sint il rumôr ritmic dal mâr Cantabric che al cjarine cu lis sôs ondis i scois da pît de mont. Il soreli nol è lât inmò a mont ma za e tache a piâsi cualchi lûs. Cjalade di ca sù, Donostia e je maraveose. Impussibil no inamorâsi. Ancje par un, come me, che nol ame il mâr e nancje lis citâts.
E pûr o soi chi. A son za passâts dîs agns di cuant che o soi partît. Al è cui che al va vie par resons di cûr o par voie di aventure, la plui part però e partìs par cirîsi un lavôr, par scjampâ di une vuere o de miserie. Jo no. Jo no parten a nissune di chestis categoriis. Se mi domandin parcè che o soi partît, mi inventi alc. La veretât e sarès dificile di spiegâ, massime di chestis bandis. Achì no rivaressin a capî un popul che al bandone la sô lenghe e la sô identitât. Che nol combat par difindilis. E che al cjale cui che lu fâs come se al fos un mat. O ai lotât par agns, convint di podê cambiâ lis robis. Po mi soi rindût. Vinçût dal disconfuart. E prime che la maluserie e finìs di scjafoiâmi o soi vignût achì.
Nol è stât facil. Nissun lûc al è perfet. E pûr achì o soi tornât a nassi. Nol è un câs se chest al è l’unic paîs che al cjape il non de sô lenghe e no il contrari. Euskal Herria. La tiere là che si fevele par euskara. Achì al è basc cui che al fevele par basc, nol impuarte dulà che al è nassût. Nol è stât par nuie facil ma je ai fate e cumò, ancje se ogni tant mi sucêt di inçopedâmi, nissun mi calcole plui di forest.
A son za passâts dîs agns. Dîs, par basc, si dîs hamar. Amâr come il savôr che mi sint in bocje se o pensi ae tiere che o ai lassât e al parcè che o soi partît.
Cumò però o soi chi. Sentât su chest rivâl o cjali la citât sot di me. E je cussì biele. E je la mê cjase. E intant che il rumôr dal mâr mi niçule o pensi che aromai, par me, hamar al vûl dî dome dîs.

di Carli Pup

#836

Conte vincidore dal Contecurte Day 2019 – edizion Dîs dîs dîs