Conseis di scriture: Stephen King

Il scritôr merecan Stephen King al è nassût a Portland tal 1947 e al è un dai plui innomenâts autôrs di orôr e fantasience vivents. Al à scrit plui di otante libris, fra chescj IT, Carrie, Shining, Misery, La metât scure, Robis preziosis, la serie La tor nere e tancj altris romançs e libris di contis. Des sôs storiis a son stâts gjavâts fûr plui di trente films. Tal libri On Writing, mieç autobiografie, mieç manuâl di scriture, al spieghe ce che al ocôr par scrivi une buine conte, o romanç. No stait a fidâsi de trame, la trame no covente!

Secont me contis e romançs e son fâts di trê parts: narazion, che e puarte la storie dal pont A al pont B e ae fin al pont Z; descrizion, che e da al letôr une ambientazion cuntun savôr di realtât; e dialic, che al da vite ai personaçs midiant dal fevelât.

Si domandarês dulà che e je la trame in dut chest. La rispueste, la mê rispueste a ogni mût, e je: inniò.

Soi malfident de trame par dôs resons: parcè che lis nestris vitis e son pe plui part cence, ancje cjapant lis precauzions plui resonadis e fasint i programs plui precîs; e parcè che o crôt che la costruzion di une trame e la spontaneitât de creazion vere no sedin compatibilis. Al è miôr che su chest pont jo o provi a jessi il plui clâr pussibil, parcè che o vuei fâus capî che la mê convinzion plui profonde su la creazion di storiis e je che di fonde si scrivin di bessolis. Il lavôr dal scritôr al è di cjatâur un puest dulà cressi (e dopo trascrivilis, naturâl). […]
Jo o crôt che lis storiis si puedin cjatâ, tant che reperts fossii. Lis storiis e son reperts, sclesis di un mont preesistent e discognossût. Il compit dal scritôr al è di doprâ i struments de sô cassele dai impresçj par tirâju fûr cence ruvinâju. Des voltis il fossil che o cjatais al è piçul, tant che une cape. Des voltis al è grandonon, un Tyrannosaurus Rex cun dutis lis sôs cuestis zigantis e i dincj salvadis. Ma che e sedi une conte di mieze pagjine o un romanç di mil, lis tecnichis par sgarfâ a son di fonde simpri chês. […] al è impussibil gjavâ fûr il fossil de tiere ancjemò intat. Par ruvinâlu il mancul pussibil al è miôr fâ di mancul de pale e doprâ imprescj plui delicâts: un soflet, une molete, se mai un spazolin di dincj. La trame e je un imprest plui grues, e je il picon dal scritôr. E je grese, mecaniche, cuintri la creativitât. […]
Jo mi met une vore di plui tes mans de intuizion e o ai podût fâ cussì soredut parcè che i miei libris si fondin suntune situazion plui che suntun mecanisim. […] Chel che o vuei fâ al è meti un grup di personaçs (salacor doi di lôr o un sôl) intune situazion e viodi cemût che si disberdein.
Prin di dut e je la situazion. I personaçs, simpri cence forme tal inprin, a vegnin dopo. Cun chescj ponts di riferiment ben clârs tal cjâf, o tachi a contâ. Spes o ai une idee di chel che al sarà il risultât, ma no ai mai pretindût che i personaçs e fasessin a gno mût. Al contrari, o vuei che a fasin a mût lôr.
A son câs dulà che la soluzion e je chê che o ai imagjinât jo. Plui dispes dutcâs e je une robe che no mi spietavi par nuie. Par un romanzîr di suspence chest al è il miôr. In fin dai conts jo no soi dome il creadôr dal romanç ma ancje il so prin letôr. E se no soi bon jo di proviodi ancje cun grande aprossimazion cemût che al larà a finî […], o pues jessi avonde sigûr di tignî vive tal letôr la gole di zirâ pagjine.
E par altri parcè bacilâ pal finâl? Parcè pretindi di vê in man la situazion a ducj i coscj? Prin o dopo ogni storie e scuen saltâ fûr di cualchi bande.

Conseis voltâts par furlan
De Sartorie de osterie.

6 comments