O VIN UNE GRANDE GNOVE!

Za fa trê agns, ai 16 di Zenâr dal 2020, us rivave te cassele de pueste eletroniche, a voaltris prins iscrits te Liste di Contecurte, la prime Conte dal Mês scrite dal Ostîr, dal titul “Fum” e subit daûr si podeve lei “Cjalant il fum“, l’articul peât ae conte, scrite de nestre Coghe.

La storie e jere ambientade in direte, come vuê, ai 6 di Zenâr 2020, ator di un pignarûl (chel di San Pelai, ancje se no si dîs) inte dì de Epifanie. Nuie si contave di infet o robis di cheste fate. Sì… al jere rivât cualchi revoc de Cine, intai ultins dîs dal 2019, ma nissun al podeve imagjinâ il davoi che al sarès saltât fûr intal an plui dificil e plen di fastidis di dute la Ete Moderne. E i nestris doi autôrs plui ferbints, Raffaele Serafini e Serena Fogolini, a àn sielzût propit chest an par inviâ un progjet che al varès compagnât ducj i iscrits ae Liste par dodis mês, regalant ogni volte narative e culture. E a cjalâ cumò dut il lavôr fat, al è di no crodi.

Fum, Len, Boris, Tiere, Butui, Jerbis, Claps, Pomis, Fros, Piere, Vues, Nêf. A son chescj i titui des contis par cui che lis leieve in direte, dai pdf che la nestre Sartore e meteve adun. E di prionte o vevin simpri metût cualchi idee dentri e dulintor, sedino dissens, contis fantasime, tocs di teatri o di musiche, manuâi, loteriis e altris matuçadis nassudis de clape di Chei di Contecurte. E par ogni storie al è vignût daûr l’articul che al spiegave la fonde di tradizion e folclôr furlans che si platave inte conte. Pignarûi, tomâts, cidulis, rogazions, scjarnetis, macs di Sant Zuan, Sant Ramacul, sagris, benandants, purcits, Vilie dai Sants… us vin contadis une vore di robis.

E cumò, par ducj chei che a jerin e chei che a no jerin, al sta par saltâ fûr IL LIBRI! 

“Lis Contis dal Mês” al è un libri di sù par jù 320 pagjinis, che al à dentri lis 12 contis lungjis dal Ostîr, Raffaele Serafini, e i 12 articui de Coghe, Serena Fogolini, e dongje di chescj ancje la maniere par recuperâ ducj i contignûts che o vin ufiert, mês par mês.

La scree dal libri e je proviodude par sabide ai 21 di Zenâr 2022, li dal Agriturism Pituel, aes 18.00. No sarà une presentazion, ma une ocasion par bevi alc insiemi, cjoli il libri, fâsal firmâ e fâ une cjacarade cui autôrs, o ancje dome par saludâsi. Subit daûr, aes 20.00 si fermarin ancje a cene di CorseCurte-Contecurte, vierte a ducj, come che o cjatais scrit ta chest articul ca.

Dopo de scree, il libri al sarà disponibil su Amazon al presit di 15€. Ma… se o volês une copie al presit speciâl di 13€ e sparagnant lis spesis di spedizion, al baste che nus scrivedis une mail. Podês cumbinâ di ritirâle te sere de scree, o pûr tal tabachin Eredi Gomba-Pagot di Sclaunic, o consegnade di un di noaltris di Contecurte se si incrosìn. Tal câs, par paiâ o vin ancje une postepay o paypal, che o cjatais te pagjine dal libri.

A noaltris nus somee un biel libri, sedi par il nivel des contis e dai articui, sedi parcè che al è une sorte di testemoneance che e mostre cemût che il Friûl, cui pîts tant che lidrîs plantadis intal teritori, al à frontât l’infet e, soredut, i mudaments che al à puartât intal Friûl di chel an bisest. E cun di plui al è un libri biel di regalâ, a cui che al vûl lei par furlan e scuvierzi il Friûl in maniere lizere e cuntun prodot fruibil, che al meretave jessi publicât.

E po… al è simpri IL PRIN LIBRI DI CONTECURTE!