CorseCurteDicembar#15 – Tun scjas di code

#15 – Tun scjas di code

La buinore e je ancjemò impisulide cuant che Marzia e rive sù ae gleseute. Madracs di vapôr si jevin intal aiarin crût, biel che la femine e torne a cjapâ flât.
La buste gjavade de sachete e pâr slusi sot dal cîl cinisin. Timp di nasâ la nêf, ancje se par cumò al somee plui butâsi in ploie.
Ma forsit chel al è dome il so umôr, si dîs Marzia intant che e displee la letare. No covente lei, si vise ogni peraule dal oncolic. Dal rest, aromai e je une di famee ta chel repart. Prime il nono, dopo la agne… e cumò jê. No si scjampe, ae ruede dal destin, e la sô e veve zirât tant che un boomerang. Sbam, in plen cjâf. E i salte fûr un sangloç maluseriôs ae idee des metastasis tal cerviel. Sîs mês, forsit alc di plui, forsit mancul.
Il prin pinsîr al è stât par Lorenzo, in Canadà. Une borse studi di 9 mês. A vevin za metût in cont che nol sarès tornât cjase ta dut chel timp. E cumò? Jerial il câs di visâlu? Par fâ ce, i varès dome ruvinade la esperience, e po, nol jere dit che lis robis a lessin cussì mâl.
E dopo, clare, al jere Andrea, in spiete di une decision. Vincj agns di matrimoni. E bot e sclop no jerin plui rivâts a intindisi. Cumò e saveve che il probleme nol jere lui, ma jê, come se il carûl dal cancar al vês lavorât fin dentri dal sintiment. La vite ti cambie, e ancje la muart e sa il so fat.
E lampe une maglutute zale framieç dal fueam. Un repipin, e i pâr di tornâ frutine, cul nono che i insegne a ricognossi il respîr de nature cu lis sôs plantis e nemâi. No ‘nt veve plui viodûts di cuant che lui al jere muart. O forsit, no i veve plui fat câs.
L’ucielut al pâr cjalâle un lamp, po dopo, al svole vie tun scjas di code. Usgnot jal contarà a so fi. E magari e clamarà ancje Andrea, che no à vude nancje la creance di rispuindi ben al so whatsapp di Nadâl.
Il prin floc si poie parsore de buste, lizerin. Pôcs minûts, e dut al è cuviert di un tabâr fof.
Ore di tornâ cjase, si dîs Marzia, biel che lis sôs olmis a vierzin une gnove ferade parsore dal troi.

di ***
1***