Kurt Vonnegut (1922-2007) al è un scritôr merecan che al à scrit innomenâts romançs e ancje tantis contis. Al è considerât un dai scritôrs plui impuartants dal Nûfcent, cognossût soredut par Macel n. 5 o la crosade dai fruts, ispirât a la sô esperience te Seconde Vuere Mondiâl (al veve scombatût tes Ardenne e in Gjermanie). Altris siei libris innomenâts a son Glaç-nûf, La gulizion dai campions, Lis sirenis di Titan e Mari gnot.
Conseis dal scritôr merecan Kurt Vonnegut par scrivi une buine conte curte:
- Dopre il timp di un perfet scognossût in mût che no i somei di vêlu butât vie dibant.
- Dâi al letôr almancul un personaç par il cuâl tignî
- Ogni personaç al varès di volê alc, ancje dome une tace di aghe.
- Ogni frase e à di fâ une di chestis dôs robis: mostrâ un personaç o puartâ indevant la storie.
- Scomence il plui dongje pussibil da la fin.
- Sei sadic. No impuarte trop dolçs e inocents che a son i tiei personaçs principâi, fâs in mût che i sucedin robis tremendis cussì che il letôr al puedi viodi di ce tele che a son fâts.
- Scrîf par dâi plasê dome a une persone. Se tu vierzis il barcon e tu fasis l’amôr cul mont, par dî cussì, la tô storie e cjaparà la polmonite.
- Dâi ai tiei letôrs la plui part des informazions il prime pussibil. Che e ledi in casin la suspense. I letôrs a varessin di podê capî cussì ben ce che al è daûr a sucedi, dulà e parcè, in mût di jessi bogns di finî la storie di bessôi, tal câs che i grisons a vessin di mangjâ lis ultimissimis pagjinis.
Conseis voltâts par furlan
de sartore de Osterie
2 comments On Conseis di scriture: Kurt Vonnegut
E chest al è il prin – a parê dal Ostîr, bielissim – post di conseis sul cemût scrivi (une conte o cualsisei storie). I conseis a son chei di Kurt Vonnegut, un scritôr babio e forsit masse pôc cognossût, che al à rivât a messeda fats tragjics e ironie intune maniere une vore personâl e ben jessude. E ancje in chescj curtissims conseis a si viôt. Par ducj chei che a àn voie di partecipâ al Contecurte day, chescj conseis a saran oro! E un grassie a la nestre sartore che nus regalarà cheste schirie di articui!
Une indicazion di babio valôr gracjis a le sartore de nestre ostarie par podê disbratâ une conte come che si devi. Lussian