Pôrecurte Day 2021 – Scriveit!

Al è un apontament che di cualchi an nus compagne e che al è simpri stât l’event di Contecurte plui partecipât e spietât. Il Contecurte Day. La prime edizion e je stade aromai tal 2016, a Listize, e no savevin ancjemò cemût gjestî ben la robe. O cjatais un struc di dut ce che al è sucedût ta chê volte inte pagjine in cjar e vues, come simpri. La edizion dal 2020, stant lis limitazions e lis sieriduris, le vin fate sul web, e lu vin clamât CovidCurte Day, e ancje se e je vignude une vore ben, no si pues dî che e sedi stade une edizion normâl. A noaltris nus è simpri plasût lâ a lei lis contis “dal vîf”, denant de int, cu la idee che la “conte curte” e je une forme leterarie che in Friûl e à il so valôr, saltant fûr des stalis e des bocjis sdenteadis dai vielis.

E par chest an, stant che l’infet nol è finît e anzit, o sin sigûrs che cu la stagjon pene rivade al larà cressint, meti adun un event avonde in grant al è un pôc une scomesse, ma in gracie de int vacinade e dal green pass, che al permet ancjemò di podê fâ spetacui invezit che stâ sierâts, o vin decidût di scometi e di fâ istès l’event, o almancul provâ a meti adun la robe, sperant di no spostâ dut sul web, che par chel si è simpri in timp. Insome… la gnove e je cheste: IL CONTECURTE DAY 2021 SI FASARÀ!

E clare, no je une sorprese, stant che o vês bielzà viodude la locandine che e pant il puest (Codroip, inte sale Abaco, in Corte Italie, vie IV Novembar, 19) e il cuant (sabide ai 30 di Otubar, tor 6 di sere). Ma no sin achì dome par pandi la gnove, ma par une robe plui impuartante: LIS CONTIS!!! Eh, sì, parcè che insome… par fâ un Contecurte Day, la robe che e covente di plui a son lis contis, si che duncje, chest messaç al va a ducj i contecurtârs, parcè che e je vignude la ore di scrivi une biele conte… di Pôre!

Il teme di chest Contecurte Day al sarà propite chest, lis contis di pôre, e miôr ancjemò se a tirin fûr la pôre nostrane, chê su lis tradizions de Vilie dai Sants, che a son une vore, o lis figuris dal nestri folclôr, come lis aganis, i sbilfs, i maçarots, la gjate marangule e vie cussì… Ma di cheste bande cuissà che no rivedi cualchi sorprese propit achì su la osterie.

LIS REGULIS PAR PARTECIPÂ AL PÔRECURTE DAY 2021 COME CONCORINTS a son facilis. Mandaitnus une conte inte solite maniere (ven a stai par pueste eletroniche a contecurte@gmail.com) che e sedi (par scugnî) plui curte di 2000 batudis, spazi comprendûts, a scomençâ di cumò e dentri dal 20 di Otubar. Il teme al è clâr, ma se o volês cjapâ ispirazion, su la nestre osterie baste fracâ il tag “gjenar di orôr” e us saltin fûr desenis e desenis di contis di pôre di lâ a scrutinâ. L’Ostîr in persone al selezionarà lis miôr 12 contis rivadis (sperant che a rivin almancul 12, insome) che a deventaran protagonistis de serade e a saran letis, in maniere dal dut anonime, dai nestris letôrs intune sfide dulà che il judic al sarà il public in sale. Come che o savês, te nestre competizion, e je la conte che e va a barufâ cun chês altris, e no l’autôr, par chest dome l’Ostîr al savarà cui che al à scrit ce robe, e lu disvelarà dome ta chê sere.

Par vignî al Pôrecurte Day e je conseade la prenotazion che si pues fâ scrivint une mail a contecurte@gmail.com opûr cuntun messaç WhatsApp al numar dal Ostîr 328_0665261

Nus pâr di vê dite dut, ma par ogni domande o sclariment, domandait dut chi sot tai coments, o te pagjine facebook, come simpri. Noaltris o tachin a pensâ a lis robis tecnichis, e voaltris… SCRIVEIT!

1 coments On Pôrecurte Day 2021 – Scriveit!

  • E cussi contecurte no si rint e ven indenant cuntune miracolose cidele cuintri ” L’ infame morbo”. Compliments a ducj i components de amade ostarie. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît