Lupo Manarie e il Cont Ecurte

Se o cjapais la sdrucje che di Sclaunic e puarte a Oracabessa, e li de beorcje che e mene a Selfoss o inviais il mus a man çampe, o rivais drets devant dal cjastiel dal Cont Ecurte. Sunait il campanel, se nol ves di jessi sul puiûl, a cjalâ i siei cjamps di cisarons. Al è facil di cognossi: i cjavei, lis braghessis, lis maniis de cjamese, i cjalçuts, lis ongulis e parfin la barbe e lis mostacjis ju ten, simpri, une vore curts.
Ma parcè varessiso di lâ li dal Cont? Facile! Il Cont al è un che al sa une vore di robis, anzit, cuasi dutis, e al è simpri zentîl e pront a pandilis; cun di plui, cuant che tu i domandis alc, ti rispuint simpri in maniere une vore strucade, cence fâti pierdi timp. Clare che un cussì, ducj i furlans lu tegnin une vore in cont.
E si pues fâi ancje lis domandis plui stupidis, parcè che a lui no i interesse masse di nissun, nol judiche e cussì no si vergognisi mai. Par chest Lupo Manarie, che al è un bon lôf, ma cualchi volte un pôc dordul, al à pensât ben di lâ li dal Cont a sclarîsi i dubis.
«Bundì!» al dîs a li vuardiis e a lis lôr spadis cetant curtis che a jerin in pratiche dai curtìs.
«Peraule segrete par jentrâ?»

(O vês di savê che ducj a podevin lâ a cjatâ il Cont, ma par dâi un pôc di sodisfazions aes vuardiis e fâlis contentis bisugnave dîsi una cualsisei filastrocje o frase che ur plasès. Nol costave nuie e lôr a cjapavin gust, ven a stâi che se us capite di lâ a cjatâ il Cont Ecurte, preparaitsi alc).

«Contimi Cont Contis Contentis!» al pant Lupo Manarie, e i soldâts, ducj contents, lu fasin subite passâ.
«Oh mandi, Lupo Manarie, cemût mai di chestis bandis», lu salude il Cont, ancje lui content, pene che lu viôt rivâ.
«Parcè che no soi di chês altris, siôr Cont».
«Juste!»
«O varès cualchi domande di fâi, siôr Cont. Puedio?»
«Se a son curtis, tropis che tu vûs!»
«Alore. Stant che soi iscrit ae Liste di Contecurte, ajal presint?»
«No utu? Soi iscrit ancje jo!»
«Sì che duncje o volevi savê cemût votâ lis contis dal CovidCurte day, saial, no volarès fâ falopis…»
«Lis âstu letis, Lupo?»
«Minimo! Dutis dodis!»
«Alore il plui al è fat! Tu viodarâs che ti rive un messaç inte mail, e tu tu i rispuindis a chel dentri di domenie ai 17 di Mai e tu i disis i 12 titui metûts in ordin, a scomençâ de storie che ti è plasude di plui!»
«Dut ca?»
«Dut ca».
«Ma puedio scrivi ancje dome i numars?», al domande Lupo Manarie mostrant lis çatatis cu lis sôs ongolatis lungjis e arcadis, «Saial, no soi masse babio cu la tastiere…»
«Nissun fastidi, al baste che tu i scrivis la liste dai numars. Il prin che tu scrivis al è chel de conte che tu volaressis che e vinci, e daûr ducj chei altris».
«Ma che al sinti, siôr Cont. Ma se, cumò, metìn che jo vedi un amì che ancjemò no si è iscrit a la Liste, no jo eh, che nol pensi chest, disìn un amì. Insome, puedial iscrivisi cumò e votâ istes?»
«Ma sigûr, baste che al sedi prime dal 17 di Mai! Ogni vôt in plui al è un di plui che al à let lis contis. Un ben par ducj!»
«Ma che al sinti ancjemò une robe, ma… metìn che jo sedi un autôr… puedio votâ istes? No isal un conflit di interès?»
«Ma po si sa po, Lupo. Ma no! L’autôr, anzit, al votarà fasint il paragon e al podarà cun onestât decidi chês che a son miôr o piês de sô. Miôr di cussì! E po tu sâs… l’impuartant al è partecipâ e contâ storiis!»
«Sì, bon, ma jo o vuei savê istès cui che al vinç…»
«Ma ce discors! Tu viodarâs che Chei di Contecurte a metaran un articul sul sît inzornant vie vie la classifiche!»

Lupo Manarie, dut content, al tire fûr il telefonut dal so pêl fof e al tache a smanetâ, cence abadâ plui al Cont.
«Altris domandis, Lupo Manarie?» i domande chel, pacjific.
«Mi pâr di no… Se lis ves, siôr cont, lis scrivarai chi sot, tai coments. Vaial ben?»
«Benon Lupo Manarie! Alore mandi!»
Ma Lupo Manarie al è masse cjapât a decidi cuale des contis dal CovidCurte Day che i plâs di plui, e nancje no i rispuint!

di Rafaêl Serafin