Contecurte Day 2018 – Ce vitis!

E ve chi, a screâ il sît gnûf, cuntune gnove.
E no une gnove a câs, ma la gnove plui gnove che o vin: la croniche dal Contecurte day di îr, a Vile Manin di Passarian!
Scomencîn subit a dî che a jerin ducj presints! Ostîr, famei, berlon, camarele, massarie, poete, cjantôr e parfin la gnovissime coghe, Serena Fogolini, che e je pene rivade e la vin subite metude sot a lavorâ!
Ma cemût ise lade la robe? E lis contis? e cui jerial? E cui la vinçût?
Une robe ae volte.

Intant scomencin cun dî che l’event al jere in direte radiofoniche mondiâl su radio Ondefurlane, e che se cualchidun al à voie di scoltâsal al varès di rivâ adore a sintîle achì opûr fracant il boton chi sot!

E dopo disìn subit cui che a jerin i autôrs des contis, 12, che si son dadis bataie inte suaze dal spetacul, letis dai nestris fedêi letôrs.
Ve chi la liste, cui autôrs che cumò, a gare finide, podìn ancje disvelâus, insiemi cui personaçs che ju àn ispirâts.

1. La imboscade, di Checo Tam (Pieri, emigrât tornât in patrie)
2. Zuanat e Zuanut, di Laurin Zuan Nardin (Giovanni Rossi)
3. Une sentence tribolade, di Massim Furlan (Giuseppe Marchetti)
4. Nil, di Gianfranco Pellegrini (Nil)
5. Cul cjâf ben adalt, di Carli Pup (Ivo Osvaldo Faleschini)
6. Il soldât dismenteât, di Olga Cossaro (Angelo Cossaro)
7. Une solite bissebove di Pani, di Gianluca Franco (Toni Zanella)
8. Discolç, di Gaetano Cogoi (Bepo)
9. Marcoletis intal timp, di Jacum Trevisan (Antonio Franconi)
10. Un pês di spartî, de Fuguline (Carlo Podrecca)
11. Il çurviel in man, di Milio dai cjans (Giuseppe Calligaris)
12. Al è pôc ce ridi, di Rafaêl Serafin (Lucio Dalla Torre)

La gare, come aromai par tradizion, e je stade fate sortegjant lis contis a trê a trê e fasintlis sfidâ, cu la int che, in gracie di une schirie di balonuts, e à votât par chê che e veve miôr. A son saltât fûr cussì, jenfri une cjante e une invenzion dal cjantôr, e jenfri cualchi falope e cualchi ridade dal ostîr,  i cuatri finaliscj, che cuntun letôr diferent si son sfidâts.

I finaliscj a son stâts:

1. Al è pôc ce ridi, di Rafaêl Serafin 
2. Zuanat e Zuanut, di Laurin Zuan Nardin
3. Une sentence tribolade, di Massim Furlan
4. La imboscade, di Checo Tam

E chest che o vês pene let al è ancje l’ordin finâl, ven a stâi che, cundut che al veve ingjanât ancje i siei letôrs, al a vinçût propite l’Ostîr in persone.

Premis, in ogni câs, ’nd è stâts par ducj i partecipants, in gracie de poie de Societât Filologjiche Furlane, e bielissime e je stade la cornîs dal event, sedi pe Vile Manin, sedi pe mangjative di Sapori Pro Loco.

Ce dî di plui? Us lassin ai vuestris coments, e in curt o tacarìn a meti sù la nestre gnove cjase intal web dutis lis contis dal super event!

Mandi a ducj, e ve chi sot un pocjis di fotografiis (clicâ su lis fotos par ingrandilis).