Discolç

Al giavà lis scarpis e i cjalçuts. Al gjavà ancje la gjachete e, pleade in doi, la pojà su la spale drete. La jarbe zovine e tenare la sintive ben sot i pîts e i plaseve di plui se jentrave tal miec dai dêts. Cuant che si sintive jù, al cirive la lûs e l’aiar come une liberazion, fûr di une cjase stade di contadins e di un pari che i veve insegnât dome a ubidî.
Si visave cetant che al veve corût e saltât discolç, cence çocui e dome pal scûr si rindeve a tornâ cjase la sere. Sô mari, viodintlu disedrât, lu rimproverave ma cence rabie te vôs.

Di ca e di là dal troi, arbui di sespis, piruçârs che al cjalave ogni tant alçant il cjâf za blanc, strenzint i voi cuintri dal soreli e lis fueis. Cjaminant cul cjâf bas al cjalave i pîts ruans, e tal cidinôr dal zardin i pareve di sedi in doi: un om che al cjamine discolç e un frut implatât tai recès da la sô cussience, biel e content. Come une fotografie fate a Basilian tal Cuarante: la mame cul vistît di fieste neri, lui frutin di tete a blanc. Impins so pari. I fruts si ricuàrdin par simpri il profum da la mari, il so respîr.
No tu sês plui un frut, i diseve sô mari cuant che i saltave tal braç dopo cene, par sintî chel profum, par cjapâ une cjarece… al saveve di sedi cressût, di vê plui vues che cicin, cuatri pei tal barbuç, tant istes lu faseve di scuindon di so pari, cun lui al provave vergogne a fassi cjareçâ.

Deventât nono nol viodeve la ore che e rivàs la piçule par cjapâle tal braç, crodint che ancje jê e ves bisugne di cjarecis. Jê lu tignive strent a bracecuel, cu la sô muse dongje al sintive il calôr l’afiet, la inocenze e la spontaneitât e dopo i parevin i riçots di sô mari, il so profum.

Subit al percepî la diversitât che al sintive di vê; ce falope che si fâs a cressi cun sintiments di judizi, di rabie, di vergogne, di pôre.

Intant il soreli al veve finît il so zîr e lui, tornant cjase si fermà a meti sù i çialçuts e lis scarpis e tal scrufuiâsi al viodè che al veve rodolade la gjachete, come se e fos une pipine.

di Gaetan Cogôi

#731


Bepo di S.

Bepo nol à nuie di straordenari, al podarès jessi un furlan come ducj, ma forsit inmò di plui un om, come ducj. Un om che al cres e che planc a planc al tache a cambiâ tignint simpri plui in considerazion il judizi di chei altris e la vite frenetiche dal dî di vuê dominade dal ciment, de plastiche, dal fier. Dome rivât a sedi blanc di cjavei, dentri dal zardin di cjase sô al cjate e al riprent une relazion personâl direte cence intermediaris cu la tiâre e cun se stes. Lu si viôt cussì fer par oris, discolç, a cjalâ un morâl, une rose o une mariutine che si rimpine sù par un fros di jerbe. Al è clâr che la int dal paîs lu cjati figure strambe e si pensi che al vedi dât di mat. Dopo cun pôcs al cjacare e cun pocjissims al fevele di ce che al cîr, discolç, tal zardin di cjase sô. Se lu cjati, no vin savût, ma che al sedi li, nus al à sigurât.

3 comments On Discolç

  • E vuê us metìn sù la seconde conte dal Contecurte day, scrite di Gaetan, nestri contecurtâr dal plui resints, tirât dentri a fuarce te Osterie dal Ostîr e de Massarie. Gaetan nus regale une conte che e plate plui di ce che e dîs, une vore dolce, dulà che il timp al ven savoltât e no si capìs ben cuant che al cambie, te storie. La conte si siere cuntune imagjine di gale, une vore biele e evocative. No jere forsit conte “di gare” parcè che si gjolt a leile tal cuiet, come Bepo, protagonist di paîs, che al podarès jessi di ducj i paîs furlans.

  • Une biele conte,indulà che il personaç al vîf le gjionde dade dai bens de nature e no di chei prodots da sience umane. Lussian

  • Pingback: Contecurte Day 2018 – Ce vitis! | Contecurte ()

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît