Saveri Sengar al polsave su la poltrone te sô buteghe di anticuari, ancje se al saveve che al varès podût indurmidisi di bot par sveâsi intun altri timp. Al jere daûr di lei Antonio Franconi e la nascita del circo di Giancarlo Pretini, un libri râr ma no masse che il so amì Arcjan Rinalt, professôr in pension e come Saveri passionât di storiis straordenaris, i veve regalât dopo vêlu cjatât intun mercjadut di strafaniçs ai zardins di Codroip.
“Dal moment che o seis usât a fâ marcoletis inte Storie, o ai pensât che podeve interessâi le storie di Franconi, il prin a fâ des marcoletis une profession” i veve dite Arcjan denant di un tai di neri. Tornât te sô buteghe, Saveri si ere sprofondât te leture, ma il vin al veve fat il so efiet e dut a un bot i colà il cjâf sul libri e s’indurmidì.
Si sveâ cuntun suston par lis bergheladis di une barufe. Saveri si ricjapà dal indurmidiment e al capì che al si ere sveât intune ostarie. Al taulin dongje, tre omps in pîns sieravin intor un cuart, lu sburtavin a jevâsi e lu tiravin pe cjamese: “Ven fora, furlan, te ghà provà a ciavarne coe carte e nò te ciavemo coe man” a sigavin, strissinantlu difûr par pacâlu. Saveri i le daûr e al scuvierzè di jessi finît a Vignesie, di gnot.
“Francon, dèsso ti te torni quel che ti gà robà: se no ti svodi le tasche, te svodemo la pansa.”
Intal scûr Saveri al olmà il lusôr di une lame in man al plui grues dai venezians. Ma plui svelt ancjemò Saveri al viodè il lusôr svualant di une altre lame che, de man dal Franconi, e le a impirâsi su le spale dal venezian.
Intant che i venezians si ingrumarin ator dal lôr amì ferît, Saveri Sengar al cjapà chest Antonio par un braç e tacarin a corî par pierdisi intal intric des calis.
Dome dopo un biel toc, si fermarin a rifladâ intal scûr di un sotpuarti.
“Franconi, forsit al è miôr che no si fasedi plui viodi chi dulintor.” Al soflâ fûr Saveri.
“I venezians a no san piardi. Ce idee chê di tirai il curtis, eh?” I ribecà Franconi, sfladassant esaltât.
“Sì, magari no tant elegant… – al cirî di cuietâlu Saveri – i pensi, siôr Franconi, che le int a preseares di plui a cjalâ un artist cussì brâf di sfrissâ un om, cence copâlu pardabon… al podarès jessi une biele idee pal so circo.”
“Dome sfrissâ? Une prove di abilitât, insome! A podares stâ veramentri ben dongje dai numars che i ai ininment: saltarins a cjavâl, bestiis salvadis, balarins, matarans, mugnestradôrs di leons…”
“A Lion! – al sierà svelt Saveri – Parcè no scjampaiso in France, monsieur Franconi?”
“Mugnestradôr di leons a Lion – al riduçà Franconi – no podarès tacâ miôr!”
Cuant che Saveri tornà a sveâsi te sô buteghe e intal dì di vuê, al pensà che, veramentri par cheste volte, le sô marcolete intal timp a ere stade degne di un saltarin dal circo.
di Jacum Trevisan
#983
Personaç: Antonio Franconi
Nassût ai 5 di avost dal 1737 a Udine, Republiche di Vignesie – muart ai 6 di dicembar dal 1836 a Parijgi, France, impresari considerât tant che il fondatôr dal circo in France indulà che al scjampà dopo di vê copât un om a Vignesie. Insiemi cun Philip Astley, al è il fondadôr de idee stesse dal circ moderni. Il so sium al jere chel di fâ sù un spetacul che al tignis dentri dutis lis formis di rapresentazion cognossudis inte sô epoche.
