CovidCurte Day 20 – La Croniche

Il CovidCurte Day 20 al è finît. E je finide la cuarantene, almancul par cumò, e e je vignude la ore di proclamâ i vincidôrs e la classifiche finâl, cun ducj i dâts definitîfs. E je stade une edizion particolâr, e diferente di dutis chês dai agns passâts, cu lis contis che a son stadis metudis sù sul nestri sît compagnadis dal audio, e cu lis votazions che a tiravin dentri come public i nestris iscrits ae Liste di Contecurte, che a son aromai, sù par jù, 150 e che o sperin che aumentin ancjemò.

I votants a son stâts 33 e par un spetacul che al pretindeve di lei o scoltâ dutis lis contis, metilis in ordin e scrivinus une mail, ben po, a nô nus son someâts tancj e ju ringraciin ducj. Plui di cualchidun si è svicinât ae nestre ostarie propit cun cheste version virtuâl dal Contecurte Day e se tal imprin o vevin cualchi dubi se fâlu o mancul, cumò che o vin finît, ancje se al è durât plui di doi mês, o sin une vore contents di no vê saltât un an.

Fâ la croniche di chest event nol è propit facil. Cualchi contecurtâr lu vin cjapât sù a fuarce, fasintlu partecipâ ancje se al veve dome mandât une conte, cence intenzions belicosis. Cualchi altri, invezit, al è stât une vore presint, come simpri. Ametìn che nus sarês plasût vê ancje plui di 12 partecipants, stant che dal vîf o vin di limitâ l’acès, ma virtualmentri a podevin stâ ducj, in cheste leture virtuâl des contis.

E o vin ancje di disi graciis a chei di Radio Onde Furlane, che a àn sposât ad inplen la cause e ancje in chescj dîs a trasmetin lis contis in gare, letis di noaltris de Ostarie. E a proposit, propit îr, in super anteprime, o vin dât i prins trê de classifiche.

Ma vonde cjacaris! E je ore di spiâ i autôrs des contis in gare e di pandi la classifiche finâl, magari cu lis curiositâts statistichis che ur plasin tant a chei de Osterie (o almancul, al Ostîr e a la Sartore, ur plasin).

Sartore? Cualchidun aial dite Sartore? Chê benedete che e à fat la fature di meti adun ducj i file audio e meti lis contis su Spotify (e no dome li) parcè ducj a podedin scoltâlis? Sì, ASTRID VIRILI, propit jê… E je la vincidore dal CovidCurte Day 20 cu la conte Lis metamorfosis! E a jê a van ducj i compliments di noaltris, parcè che pardabon la sô conte no à vût rivâi. Prime a partî de prime votazion fintremai a la ultime, cun ben 10 prins puescj su 33, e je stade cence dubi la storie che plui à plasût, cuntune medie di cuasi 10 coronis (sì, chest Contecurte Day si votave in coronis), che e je une vore alte, stant che il prin al cjapave 12 e l’ultin 1.

La sô storie e je poetiche, cun venaduris di fantastic e dentri une grande voie di cambiament par scjampâ sì, dal infet che nus à sierâts in cjase e metût ducj un cuintri l’altri, ma ancje di dutis lis sorestruturis di chest mont consimistic e lontan de nature. La soluzion e je tal cambiâ, nus dîs la conte… Rivarino a cambiâ in timp? No si sa, ma intant Lis metamorfosis e à cjapât 326 coronis, cuintri lis 258 de seconde rivade, nuiemancul che la nestre Massarie Margarite Cogôi, cun Libars, une conte pardabon liberatorie, ancje cheste fie dal Covid.

E juste par sierâ la terne, ve lu li il nestri Famei, Checo Tam, al tierç puest cun ISS, che cun pocjis riis al tire fûr un toc romantic e profont, che al cjale adalt e al pâr un sunsûr.

E cumò che o savês i prins trê, podìn tacâ a dâ i numars, cu la classifiche finâl (e graciis a Galliano per infografiche cui titui)!

E par cui che no si contente di chescj numars, stant che al è Excel che al lavore par nô, us regalin ancje chescj altris valôrs, che a mostrin che e je stade une vore di variabilitât, te jurie. Di fat, cuasi dutis lis contis (10 su 12) e àn vût sedi prins, sedis ultins puescj, tant par dî che i guscj a son une vore variabii e diferents, e chest al è une vore biel.

Insome… O crodìn che ancje cheste robe de classifiche, (a proposit, un graciis ancje a Lupo Manarie) che come che o savês ben no va cjapade masse sul seri, parcè che al è un zûc e il biel al è lei lis contis, e sedi stade divertente.

No nus reste che sierâ disint ce che e à vinçût Astrid… No lu vin dite subite, parcè che jessint un concors virtuâl, al jere dificil pensâ di consegnâ alc, cualchi setemane indaûr. E alore i premis a son:

1. La leture di dutis lis contis che nus mandarà di chi ae fin dal 2020, metudis sù ancje in version audio, letis di un letôr che sielzarà jê;
2. I file audio des Poesiis dal Balon, lis poesiis che par cumò si cjatin dome su la pagjine Fb, metudis adun cu la colaborazion Ostîr-Famei
3. E sarà protagoniste di une piçule conte scrite di pueste dal Ostîr.

Nus pâs avonde, par chest CovidCurte Day 20, che al veve di jessi une edizion in ponte di pîts, e invezit e je saltade fûr une edizion une vore vivarose! Ancjemò un grassie a ducj, e o sperìn che a sedis divertûts.

E come simpri… Contecurte! Contecurte! CONTE… CURTE!!!