Libars!

Al cjapave ben! Ce flamis altis! Ce odôr strani! L’odôr de libertât. A jerin libars!
Mari e bussà Teo sui lavris e i soi voi a lusivin, come che e ves une linie di fiere. Lui al cjalave lis flamis, inmagât. Trope poesie che si platave li, tes flamis altis e braurosis, tes faliscjis che a scjampavin simpri di alc, tal fûc che al cjapave a planc dulà che al jere mancul aiar a nudrîlu.
Mari si metè a balâ ator dal fûc. Prime a planc, movint i flancs al ritmi di tambûrs invisibii, e po cun simpri plui morbeç, come tal deliri di un cualchi rît tribâl. “Cjale, cjale ca! Soi une femine primitive! Bum bum bum, la Afriche! Bum bum bum, no ai plui pôre dai animâi salvadis! Bum bum bum!” Teo le cjalave, ridint cence fa rumôr.

foghere

Lis flamis, plenis di fam, a mangjavin lis mensulis, i libris, la scarpiere, i bidons, la television, l’armarut che prime a tignivin in cusine, i cussins, il tapêt de cjamare, lis çavatis, i doi comodins. Narançon, zâl, neri. Il cîl clâr parsore di lôr, chê piçule fete di lune a cjalâju, suriane come simpri.
Ce jerial sucedût? Al jere sucedût che Mari e jere sbrocade intant che e netave cul aspiradôr, disint che la cjase e jere plene di robis che no coventavin a nissun, che no si podeve vivi scjafoiâts in chê maniere, che nol jere pussibil che par netâ un al vès di fâ i salts mortâi e spostâ dute chê robe, che la vite a jere masse curte par passâle rabiâts, e che e jere stufe. A chel pont Teo, seri, al veve dite: “E alore brusìn dut!”. Je e veve tasût. Po e veve ridût. E lu vevin fat. Chest al jere sucedût.
Al cjalave Mari balâ come une mate e al pensave che e jere la femine plui biele che al vès mai viodût. In chê a Teo i vignì come un piçul rimuars, come un suspiet svelt che forsit a jerin ducj doi mats, ma lu parà subit vie. E al tacà ancje lui a scjassâ i flancs, lis spalis, i braçs, il cjâf, lant daûr ai tambûrs di Mari. Al varès pensât doman, cheste gnot e jere masse biele par ruvinâle. La piçule fete di lune e continuave a cjalâju, forsit cun bocje di ridi.

CovidCurte day 20 – Conte nr. 4
#964

1 coments On Libars!

Scrîf un coment

This site uses Akismet to reduce spam. Learn how your comment data is processed.

Site Footer