A cene cul Signôr

Cuant che Jaroni, a fuarce di spedî i coupon che si cjatavin sui pacuts di merendinis, al veve vinçût il prin premi, la cene di rive jù cun Diu, plui che lâ sù content, al jere lât sù une vore sustât.
Vistût come che si conven, chel po sì, cu la golarine dal matrimoni e i cjalçuts in tinte cu la cjamese, ma al à za decidût che no je varès fate passâ, a chel bintar. Indi veve cumbinadis di ogni, chest an, e se tancj a vevin sogjezion di lui – nancje che al ves podê di vite e muart sui oms –  lui nol jere sigure un che lis mandave a dî.
«Che si senti, che si senti, sar Jaroni. Lui al è chel dal concors des merendinis, juste?» i domande il Signôr, pene jentrât in Paradîs.
«Si ve, po. Parcè, ce altris concors sono?»
«Ihhh, Jesus! Une vorone!» i rispuint chel, segnantsi alc suntun cuader. «Un spritzut e un crostin cun persut e cren par tacâ, ce al disial?»
«Va ben dut, soi di bocje buine, ma che al sinti, jo o ai di dîle subit parcè che se no no mi gjolt la cene!»

E di li, Jaroni, i veve dite la putane che al à fat.
Mandânus jù su la tiere une simile porcarie! In dut il mont, po. Che o jerin ducj alì, dì e gnot, sierâts in cjase, devant di chei stramaladets ordenadôrs e telefonuts, ducj sglonfs di uce, di tristerie, a pandi lis pîes cjateveris, un cuintri chel altri, ducj a odeâ ducj! Ducj che a savevin dut! Un virus come chel li al veve infetât dut il mont e al veve rincoionît e invelegnât ducj!
«Insome», al veve sierât, «Che mi scusi, ma propite cheste nol veve di petânusale!»
«M-ma… ma…» al tartaie Diu. Nol sa ce dî.
«E che nol vegni a dînus che je opari dal diaul, eh, che no soi mighe çondar! O sai che chel lu à inventât lui!»
E nie. Il Signôr al veve scugnût dâi reson. «Bon, Jaroni. Cumò mangjin in pâs e ti promet che come che tu tornis su la tiere, o fâs sparî dut. Peraule dal Signôr!»
Cussì, rivât cjase dopo che al veve cenât di Diu, Jaroni al veve impiât l’ordenadôr, par viodi su Facebook se al veve mantignût.
E nuie. Cîr e cîr, ma Facebook nol esisteve plui.
Nol jere mai esistût!

1 comment