Bon Complean Contecurte!

Ai 16 di Zenâr dal 2009, intun blog nassût su Splinder, a vignivin publicadis lis primis dôs contis di un progjet di narative curte par furlan sul web che al cjapave la sburtade dai tancj blog di chei timps e la doprave par meti dongje web, contis e marilenghe. La idee e jere di creâ un alc che par talian ‘nd jerin une vore e par furlan al mancjave: un puest virtuâl dulà che si puedi lei e publicâ storiis curtis di ogni gjenar, magari modernis, che si puedìn comentâ o ancje criticâ, ma che dut chest al stici a scrivi e lei par furlan. La idee e veve cjapât cuarp a Udin, cualchi setemane prin, intune frascje dongje sant Jacum, denant di doi tais – un blanc e un neri – e doi crostins persut e cren. I doi sentâts tal taulin a jerin Rafaêl Serafin, che us sta scrivint, e Dree Venier. Chei doi no si jerin mai viodûts prin di chê volte.

Il non, saltât fûr cuasi subit, al jere CONTECURTE.

Vuê a son passâts 10 agns e Contecurte, la Ostarie Leterarie, e je ancjemò chi, devant dal vuestri nâs, e la ultime conte publicade dal Ostîr un moment fa e je la numar 800, e l’articul publicât al è il numar 1000. 

Dîs agns a son tancj. Tal web a son une infinitât, e nol è facil che un sît – se pûr cui siei sù e jù – al duri tant. Il blog al è passât di Splinder a Blogspot, al à vudis polsis e moments di sucès, al è jentrât te vite reâl cun tancj spetacui e ancje un pôc tes scuelis. Al à fat scrivi int che forsit no varès mai scrit par furlan e neancje mai scrit, e al à fat lei int par furlan che magari prime no jere usade a fâlu e magari e à imparât ancje cualchi regule di grafie o gramatiche. Di un an in ca al è deventât un sît. In dîs agns nus àn dât une man in tancj, a partî dal famei Checo, mûr di fonde de ostarie, a camarîrs, garzons, camarelis, massariis, berlons, cjantôrs, sartoris, coghis e tancj che a son masse par rivâ a visâsi di ducj. E in tancj a van indevant a dânusale ancje cumò, une man. Ma dîs agns ancje inte vite, a son tancj. O vin viodudis rivâ personis gnovis e ‘nt vin viodudis lâ vie, cualchidune ancje par simpri. Da rest, o sin une ostarie, e o sin un struc de agregazion umane e des sô dinamichis.

In dîs agns, cun di plui, ancje il mont al è cambiât, e al va in piês. Noaltris o fevelin une lenghe piçule. Une lenghe piçule, puare e bielissime, ma che come ducj i piçui, i puars e i diferents a scugnin simpri difindisi. Si che, Contecurte, sedi l’ostîr che us sta scrivint, sedi i siei colaboradôrs di cumò e di prin, la intindin come une ativitât di resistence, di difese di alc di biel e diferent che o vin gust che al resti. E no cjacarìn dome di contis. Lis contis a son dome il spieli di chest alc.

Di dut chest, lis contis a son ce che al reste. Lis contis a son dutis achì, che si puedin ancjemò lei, insiemi ai coments e a lis emozions che ognidune e da. E alore, dutis chestis peraulis, a sono par dîsi: BON COMPLEAN CONTECURTE!

E ce fasìno par festegjâ? Ce si fasie a un che al finìs i agns?

Facil! Si à di fâi un regâl!

E alore o sês visâts. A partì di cumò e intai prossims dîs, ducj voaltris, contecurtârs di cumò e di une volte, contecurtârs mancjâts e scjampâts, e parcè di no, ancje contecurtârs di doman, se o volês deventâlu, insome… o viodarês rivâ inte vuestre pueste une idee par regalâ une conte gnove ae Ostarie. La idee us al à darâ l’Ostîr tirant i siei dadui magjics che a coventin par scrivi storiis. 4 dadui di interpretâ e di fâi sù une storie che e ziri ator des solitis 2000batudis une vore elastichis.

Lui, l’ostîr, al à za tacât, e la conte che viodês chi daûr e je saltade fûr di chescj dadui (sì, sì, dadul nus fâs schifo ancje a nô, podês lei dados, come che sin usâts a dî) e  e je il so regâl ae Ostarie, ma meteit dongje ancje la la cuistion di tirâ cuatri dadui, che si fâs fature.

E no je finide. Dopo 10 agns di Osterie, nus pâr il câs ancje di meti dongje une cene, par cjatâsi chel che al pues e al vûl. Cumò pensìn a une date, e viodìn di proponi ancje chê. Ma intant, tachìn a invidâ la int a… fanûs il regâl! (E se al è cualchi contecurtâr che al à voie di vê une butade di dadui, par scrivi une conte, baste che al scrivi une mail o nus contati su fb).

E cumò vonde peraulis, un grassie a ducj e… BON COMPLEAN CONTECURTE!!!

__________________

I regâi ricevûts di Contecurte par il so complean:

  1. Clap clap clap, Rafaêl Serafin, l’Ostîr
  2. La pension, Checo Tam, il Famei
  3. Culture in semence, La Fuguline, la Coghe
  4. Secs ma bogns, Margarite Cogôi, la Massarie
  5. I dadui dal destin, Galliano di Buenos Aires
  6. Ufos che rivin e no tocjin, Barbara Battel
  7. Il câs de cassele di len, Massim Furlan
  8. Cui savê!, di Laurin Zuan Nardin
  9. L’agâr de Lyon e il disc volant, di Renzo Brollo
  10. Almost blue, di Stiefin Morat
  11. Libertât obleade, di Gianfranco Pellegrini, il Garzon
  12. Lassâsi lâ, di Michêl Londar, il Berlon
  13. Problemis di siôr, di Michêl Vuardianut Calligaris
  14. Storie di Bulletto e di une femine di Palaçûl di Done Bete
  15. Nart e Juine di Luciano Marinig
  16. L’om che al rimbalzave simpri di Stralunade, la Sartore
  17. La partide di balon di Maurizio Di Fant
  18. Il vecjo su la coline di Maghe Olstrele
  19. Nol è migo just di Gianluca Franco
  20. Tristeriis di Pablo Gortan, il Cramâr
  21. Il bosc di Vico di Luciano Marinig
  22. Lâ daûr dai siums di Egle Taverna

1 coments On Bon Complean Contecurte!

  • Se.o cjati là biciclete o rivi di Palermo ancje jo. Mi saré plasût fâ une buine mangiade, tra un tai chel altri cu la clape di Contecurte. Ma cui sa, che nol passi a cjiolmi Galliano che al rive de Argjentine. Se cussì, di sigûr o rivi ancje jo.

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît