Problemis di siôr

Si sa che i drâcs a àn lis çatis curtis. Smauc, dopo vê fiscât il plui grant tesaur de Tiere di Mieç, ven a stâi chel dai nanui di Erebor, nol veve intenzion di spindi o dâ vie nancje un carantan.
“Spindi par cjoli ce, po?” – al pensave – “No si viodin ni buteghis ni altris articui de mê taie.”
Cussì al cuietave la sô cussience, ma nancje un pinsîr par chê grande coparie che al veve fat, spudant fûc e scjassant dut il ream di chê int che e jere a stâ sot de Mont Solitarie.
“E po a disin che, se e je domande, e je ancje ufierte. Ma jo, che cumò o soi il plui siôr di cheste bande dal mont, no ai nissun che al ven a cirîmi par vendi alc.”
E cussì, dopo vê fat scjampâ ducj chei mestris minadôrs, faris e oresins cu lis lôr fameis e dopo vê poiât la panze su dut chel aur e gjemis e zoiis di ogni cualitât, nol veve altri ce fâ se no durmî.
Tal sium, il cjâf di chel sarpint nol rivave a imagjinâ altris tesaurs plui grancj, stant che no esistevin. Si veve di tignî cont chel che si veve. Ma cemût? “La miôr vuardie e sarès propit un drâc, come me.” Pecjât che lui al jere l’ultin dai siei. “Se o ai di fâ il vuardian, no pues gjoldimi chescj aurs cence lassâju, e pene che la int e capìs che no soi cjase, mi puarte vie dut! Al sarès di fâ une buse plui fonde, plui dentri tal cûr de tiere e puartâ dut alì, propit come che a fasin i nanui. Jo, cu lis mês çatutis no rivarès a spostâ nancje un sac.”
Ma al jere stât propit lui a fâ cetante coparie dai lôr e chei no varessin sigûr lavorât par un drâc dopo chel che ur veve fat. Cence contâ che fâ lavorâ la int al coste!
“Mi contentarai di savê che ducj mi calcolin come il plui siôr dal mont!”
Ma cence lâ mai fûr, cence spindi e stant alì a durmî, une vuê e une doman, planc plancut, lis zornadis a tacavin a ingrumâsi e a fâ sù ancje lôr un capitâl, ma in chel câs la sume e jere di timp.
Dusinte agns aromai e nissun al olsave lâ a dismovi chel besteon.
Intant, chei pinsîrs che prin a jerin dome un sunsûr ta chei landris çondars, cul lâ dai agns a vevin cuistât volum e, cumò, a jerin un davoi che i ruvinave la durmide e lu tormentave. “Se dome o ves cualchidun di maraveâ cu la mê sioretât… par ce fâ mi soio dispartât in cheste buse? Vonde, o ai di molâ dut e lâ vie, ma…”
I tacà a ticâ il nâs. “Puce di lari…”

di Michêl Vuardianut Calligaris
#799