Pucefadias for President  

«Dulà vâstu, viandant?»
O soi vignût di chestis bandis a cirî la tombe di un pitôr.
«E cui saressial?»
Si clame Luciano e al à zirât dut il mont prime di tornâ in Patrie. Sâstu dulà che al è sapulît?
«Ven che ti fâs viodi…»
O stentavi a crodi che la tombe e fos chê. Une normâl crôs di len e un pâr di vâs di jerbis secjis… cualchi biliet bagnât di ploie… un garoful ros pustiç…
Mi spietavi une sglavinade di rosis par une persone cussì cognossude e amade.
Di fat, zirant in citât, tu cjatis la sô presince in variis lûcs, soredut ostariis. Oltri a cetantis sôs pituris fatis su carton a son di cualchi bande parfin des raris telis.
E je ancje une radio locâl che e à un so cuadri: Pucefadias for President al è scrit parsore, a ûs une didascalie par un pipinut disegnât su la tele… un bohémien, un “loser” come il so creatôr. Come tancj artiscj che e àn fat une vite grame. I vêrs artiscj, chei che no lechin il cûl al sisteme!
E dopo, lu savìn, il nestri al è ancjemò presint inte eterne rêt cuntune sglavinade di filmâts.
Ancje chê altre sere mi è capitât di rilevâ la sô indirete presince. O ai incrosât un zovin cuntune maiute blancje a manie curte su la cuâl al jere serigrafât UN TAI DI NERI, cuntun slambri a ûs un cuadri di Fontana. La maiute e jere une des tantis ideis di Luciano.
O sintivi une afinitât cun chel zovin e o podevi fermâlu par domandâi se al veve cognossût di persone il pitôr ma lu vevi pierdût tal mieç de sdrume de int che e passonave in citât par un dai solits “miercus universitaris” fats di alcul e di droghe.
Però o ai cognossût une pitore che e zirave des voltis cul nestri artist e mi à mostrât dai cûrs di carton che lui i veve regalât. Mi à dit che la stesse sere che e veve di viodilu par regalâi une gjachete e veve savût che lui al jere mancjât.
E jo o pues riferî juste un fat che mi contà diretementri lui, tancj agns indaûr, une sclese tai siei ricuarts di une vite aventurose che lu puartà ator pal mont, ancje cul Magic Bus, parfin tal lontan Nepal…
Une dì si cjatave a New York vint finît i siei mieçs di sussistence e nol saveve ce fâ. Al jentrà intune cabine telefoniche e al cirì inte vuide la vie dulà che al jere il Fogolâr Furlan. Al rivà a destinazion e al cjatà dai oms che a zuiavin di cjartis. Ur contà la sô storie e chei no lu lassarin impastanât, lu judarin e cussì al podè ricreâsi. I vevin furnît juste un pôc di “benzine” par tornâ a partî. Par dulà? Cui lu sa?
Sta di fat che dopo agns al è tornât tal so amât Friûl e li al à vût chel grant sclop di creativitât.
O ai rifletût.
Sì, l’om al à lassât tant ma nol pues plui tornâ indaûr. Il passât al è passât. L’om al è lât. No podarìn plui fâ un discors cun lui. Al è brut constatâ chest fat. Però, des voltis, cuant che o torni a capitâ ta cheste citât – simpri plui di râr – e o cjamini par vie Glemone… ve che a retis dal Cafè Caucigh mi spieti di viodilu li, sintât su la bancje…
E je une ilusion che e dure un istant.
Cualchidun al pensarà che une tombe disfurnide e je come il so umil ospit e che la essence dal artist di cjate tes oparis che al à lassât e che a fevelin ancjemò par lui.
Ma distès jo us invidi a dâi un salût intal cimitieri di Sant Vît a Udin e a puartâi une rose… un cualsisei lili di cjamp, un vâs di violis, viodêt voaltris…