CC24Avrîl#12 – Te largjiure

#12 – Te largjure

Il cjâf mi cole jù di trop che o soi strache, e aromai al è di bant cirî di fâ fente di nuie cui altris passezîrs dal tren parcè che e sarà la cuinte volte che mi sucêt. La campagne fûr e je verde di un vert vîf, il cîl grîs sglonf di ploie i pese parsore. Cuasi mi incee di trop che al è biel.
O sês tancj e us cjali, la piel lustre e lis mans lungjis plenis di anei.
Soio spauride? No. Dome, no sai se a capîs la mê lenghe.
– Dulà sino?, us domandi.
O fasês segn di fâ planc svicinant il secont dêt ai lavris fins.
Un frutut mi cjape la man e mi vuide fin a une largjure dulà che i arbui si srarissin.
Devant di me, une statue di aur. Il soreli i baline parsore e la rint sflandorose. E rapresente une femine crote che e cjale lontan, al cuel i vês picjade une corone di rosis blancjis e rossis.
Mi met in zenoglon cemût che a fasês voaltris, che mi sês vignûts daûr cence fâ rumôr come intune piçule procession.
Un om al tache une litanie a vôs basse, e ducj i lês daûr cui voi sierâts. Mi cjati a preâ ancje jo intune lenghe discognossude. Lui: “Ine Oipo Arsa, One Ile”, e nô: “Ano Ale Eto, Estre Ía”.
Soi cussì cjapade che no mi domandi nancje ce che o sin daûr a dî. Mi plei plene di devozion fin a tocjâ cul nâs lis gjambis. In chê, un di voaltris mi tocje la spale cun malegracie e mi dîs: “Biglietto signora!”.
O alci il cjâf di buride e o cjali in muse il controlôr, che cul tablet in man e la voglade za cence pazience mi cjale ancje lui. O cjôl de sachete il biliet, mi soi ancje dismenteade di fâ il check-in parcè che mi soi indurmidide apene montade.
Cu la bocje triste e i voi ancjemò tacadiçs o torni a cjalâ fûr. Un salustri. Il soreli al bat su lis pocis di aghe dal cjamp che a deventin maglis di aur. La jerbe e continue a lusî di un vert vîf.
L’altoparlant al ripêt: “Udine, Codroipo, Casarsa, Pordenone, Sacile, Conegliano, Treviso Centrale, Mogliano Veneto, Venezia Mestre, Venezia Santa Lucia”. In efiets e somee une litanie.
O riduci e mi torni a meti comude.

di Margarite Cogôi (Glorious Grene)
#1610

3 comments