CC24Avrîl#11 – Bruts, sporcs e triscj

#11 – Bruts, sporcs e triscj

I trê seglots des scovacis di cuintri cjase sô a son centâts di mil e un refudums: no ’nt jerial spazi dentri?… al cjale e i bidons a son cuasi vueits… ahh: i peteons a an sparniçât ducj i refudums ator ator intant che a cirivin alc di bon… l’ultin neuron acessibil tal so cjâf nol devi vê funzionât al moment di tornâ a met dentri chei robis che no àn stadis un grant zovament, cavernicui…

Une Testemonie di Geova e slargje un opuscul ma lui, cence molâ, al vâ indevant… bausarie… la uniche anime che e vûl salvâ e je la sô…

Un bocon di om, in aparence inrabiât cuntune butilie de Coca Cola di doi litris, la impugne come intune partide di boxe. Un, doi, trê… al somee vêle strucade par metile intun bidon des scovacis. A ‘nd è spazi dentri, ma dut câs, cuntun colp finâl, le bute te strade e une machine le sfracaie lassantle tant che une fuee di plastiche… il “bocon di pan”, che sul moment al vosonave la sô rabie tant che cuintri un tîr di punizion, lu cjale in muse… uh!: voi di mat!: al è mior sghindâlu!, al tire dilunc cence cjalâ daûrsi…

Un sàbalo muart (1) al flote a panzarole te aghe dal puart. Al cjale dapardut e a son masse i cadavars che a flotin: la aghe e je grivie come si fos vueli: il flum plui ampli dal mont al à pierdût, dut câs, la bataie cuintri l’incuinament…

Di lontan, chei ponts colôr narancin si viodin tant che pomis di Ginkgo biloba sparniçadis par tiere, co al rive li la realtât e je une altre: un cragnôs nivel galatic al à lassât scussis di naranç parsore de jerbe impecabile e framieç dai braçs dal arbul, tant che une decorazion di Nadâl, une late vueide di bire e fâs di corone al dut: al è, pardabon, il ghiringhel dal salvadi…

Lis duliis te parietal çampe lu àn menât a fâ la cjaminade di ogni dì, tant che i a conseât il miedi, ma lis scuisitecis de vite in citât lu colpissin te muse tant che une sclopetade di mierde: in veretât la citât e je biele, ma lafè sì: e je ancje plene di sporcacjons.

di ?
#1609