titul ae fin de conte

A disin che cuant che tu pierdis lis clâfs di cjase bisugne cambiâ la sieridure, ma Mariute, la dì che Berto al jere lât vie, cu la valîs in man, sbatint la puarte e paragonant al Signôr une schirie di bestiis e besteutis, e veve fat une vore, ma une vore di plui.
«Siore? Ise sigure che i coventi propite chest prodot?» i veve domandât il marcjadant, lant adiriture cuintri dai siei interès. Ma la femine no veve vude nissune esitance e i veve dât ben plui di cualchi mês, sparagnât tai agns, per comprâ il sisteme plui tecnologjic e avanzât in materie di puartis rinfuraçadis e argnagns cuintri lis robariis. Si jere fate istruî sul ricognossiment otic dal voli e su chel des improntis digjitâls –  di meti in vore tal stes timp – e dopo di chel, cuntûn sunsûr di sodisfazione, si jere sierade chê puarte impenetrabile daûr de schene. Al veve dome di provâ a tornâ in cjase, chel porco di Berto!
Giulietta, Dyane, Flavia, Fulvia, Serena, Fabia, Felicia, Clio… Cun tropis altris feminis i vevie fat i cuars, chel maladet?! E podopo? Al veve vude parfin la muse rote di inventâ scusis! Al veve voie di convincile che chei li segnâts su la sô agjende a fossin ducj non di machinis! Puâr cocâl che nol jere altri, e veve pensât Mariute, braurose de sô valente e irevocabile decision!

di Rafaêl Serafin

 

Titul: Sierâ la puarte dopo che al è scjampât il purcit

3 coments On titul ae fin de conte

  • E ancje se o sin cuasi in fieste di ognissants, noaltris di Contecurte o cjacarìn di… purcits! Cuntune conte di chês dal purcit scritis cjapant a ispirazion lis tantis detulis su la bestie plui buine dal mont. Al è l’ostîr che nus a la conte, e nol met il titul. Juste parcè che la conte i vuadagne une ridade in plui a leilu ae fin de storie. La storie, podopo, un pôc a tire dongje dute cheste manie di sigurece che je vignude a ducj, un pôc, invezit, no à voie di fâsi cjapâ masse sul serio.

  • Vuê come vuê bigne sta atents ce che si fâs,fâ un siump cuntune machine di chês ulì, e magari compagnât de vos, al po rompi il matrimoni, se la femine lu scolte. Lussian

  • Biele! L’ostîr al è simpri l’ostîr!

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît