CC24Fevrâr#28 – Sirocade

#28  – Sirocade

Tal paîs di Massepassons dut al è cuiet. Di lunis di sere no si viôt nissun par strade. La gnot e je cence stelis, platadis daûr di une sfilzade di nûi.
Marc al è distirât sul divan a cjalâ un film, te stanzie dongje i fruts a duarmin. L’an che al ven ancje Luzie e tacarà lis mediis, là che Jacum al va za. Nol pues plui figotâju come une volte, e ciertis seris chest i mancje di plui.
Vivi di separât cun doi fruts nol è facil, ma la mari e je masse lontane par rivâ a dividisi i compits in mût paritari. Cumò però la cjase e je cuiete, dome la laveplats e roncee in cusine.
Di colp, lamps zâi a sdrumin i nûi, il cîl al devente colôr cafelat. Un aiar fuartonon al tache a scjassâ i arbui, ma cence fâ nissun rumôr: al è cussì fuart che si distachin lis fueis e i ramaçs. Marc al va fûr a viodi, e lu scjafoie chel aiar cjalt e tacadiç tant che un sirop dolç.
Al bute jù i garofolârs tal zardin e al puarte vie la blancjarie picjade sui fii, che e sparìs adalt. Al spalanche la puarte e al jentre dentri in cjase, simpri cence nissun sunôr, al lasse in bande la cjamare dai fruts, lôr nancje ju tocje, ma al va fin ta chê di Marc.
Il so barcon si spalanche e cussì i armârs e i scansei: vie fûr pai veris a svolin cuadêrs, diaris, fotografiis…
I biliets dai concierts, lis cartulinis. L’aboç di un romanç mai finît. Il diplomi di lauree te curnîs. Vie dut, scancelât par simpri di chel aiar tacadiç e misteriôs.
E ae fin e rive la letare. Un sfuei sôl, cuviert di scritis devant e daûr, simpri la stesse frase ripetude: Un nuie neri sanc al tacave a zirâ, al tacave a zirâ, al tacave a zirâ.
L’aiar i sbat il sfuei su la muse. Dopo al rive un altri sfuei, compagn. E un altri, doi, dîs, cent sfueis che i mulinin ator tant che une trombe di aiar, anzit di cjarte, e i fasin inzirli fin che al cole distirât, e lu sepulissin intune tampiestade di sfueis.
Cumò, dome cumò, l’aiar al fevele: Tu tu sês speciâl: nassût, no creât. Un om vêr intun mont di aparencis. No stâ pierdi di viste la strade.

di Muspilli
#1565