ItalYōkai, il prin libri par talian dal Ostîr

Cui che al à smicjât sul sît dal Ostîr o sui siei social, in chescj dîs, al à viodût che al jere un cont denantdaûr fat di mostris e fantasimis. E vuê al è chel dì che o podìn disvelâ dut!

E je rivade LA GRANDE GNOVE!

Clare che par chei che a seguissin la CorseCurte24 la robe e jere platade tant che un madrac intune sachete, stant che la gnove al jere il premi stagjonâl par i vincidôrs di stagjon, ma al è ben contâle un pôc miôr, cheste grande gnove.

L’Ostîr al à publicât un libri in doi volums par talian, e a dîle dute, vuê e dome vuê, ai 3 di Mai, lu podês parfin comprâ su Amazon a cuasi metât presit, 7€ ognidun.

Ma ce libris aial publicât? Alore… a di part che o cjatais dutis lis gnovis sul so sît, ma se o vês sflacje di fracâ leams o lei par talian us contìn dut achì, in struc.

Raffaele Serafini, il nestri Ostîr, dopo cetantis publicazions par furlan, al à decidût di publicâ lis sôs contis in lenghe foreste, par talian, par so cont, cul jutori di un colega, Luche Filipuz, pe part plui peade ae sagjistiche e ai media. Il libris a son doi, ma il progjet al è unic.

ItalYōkai – Storie di yōkai in Italia, volume porpora al à dentri 10 contis e al è un tic plui horror e fomentin.

ItalYōkai – Storie di yōkai in Italia, volume turchese al è dentri ancjetantis contis, ma cun creaturis plui zuiarinis e maluseriosis.

Ogni conte e je ambientade intune regjon taliane e e à dentri un yōkai, une fantasime dal folclôr dal Gjapon, che e ven descrite e si pues discuvierzi lis sôs aparizions in fumuts, films o zughets. In bande di chest o cjatais ancje cetancj haiku innomenâts, une grampe di ilustrazions de conte e une schirie di citazions di musiche e di leterature.

E stant che achì su la ostarie par solit si fevele di scriture par furlan, no vin voie di robâ altri spazi e le sierìn achì. Se o vês voie di cjolilu spesseait, se o sin ai 3 di Mai, ma si no i libris no costin masse, 12,5€, e chei che ju àn lets a disin che a son biei. E ancje l’Ostîr, nus fâs savê che al è une vore content dal risultât e che al voleve scrivi un di chei libris dulà che dutis lis contis a son bielis e i pâr di vêle cumbinade avonde.

Ah no, une ultime robe impuartante, usgnot, ai 3 di Mai, Rafaêl e Luche a fasaran fieste li dal agribirrificio Aquila D’oro di Beivars, des 6 sot sere indevant, fin a stufâsi. Se o vês voie di passâ a bevi une bire insiemi passait, o sês i benvignûts! E a saran dal sigûr sorpresis, e ancje cualchi… yōkai!

Un salût di Rafaêl e Luche

Ve ca i leams direts par cjoli i libris:

Volume Turchese

Volume Porpora

1 comment