La telefonade de sûr e rivà che al jere sot de doce. Pocjis peraulis e ae fin un: “O partìs cumò”. Une clamade in ufici par cancelâ i apontaments, cualchi vistît tal trolley e al jere pront.
Marina lu cjalave biel che si preparave: “Vuoi che venga anch’io?”.
“No, no. Figurati. Ti chiamo quando arrivo”.
Une bussade e Marc al cjapà la machine par tornâ ae cjase di un timp. Milan-Udin, i saressin voludis sù par jù cinc oris, al calcolà, metint a fûc une trate che nol faseve di un toc. Un biel toc. Trop jerial che nol lave a cjatâ i vecjos? 5, 6 agns? Di plui, si corezè, sgarfant te memorie.
Dîs agns. Dîs agns che nol tornave. Pussibil? Sì, dacuardi, il lavôr, lis domeniis cunTommy a balon, i milante casins… Purpûr, i someave impussibil che al fos passât dut chel timp. E cumò, tornâ come un fi prodic, par saludâ so pari pe ultime volte e strucâ une vite intun pâr di dîs.
Cuant che al rivà, sô mari e sô sûr a jerin di fûr, in spiete. Lis dôs feminis lu cjalarin cun afiet. Si sintì ancjemò plui in colpe. La mari lu menà te stanzie li che al polsave il vecjo, aromai za in viaç par un mont di li che no si torne indaûr, po dopo, lu invidà a meti alc sot dai dincj, intant che jê e tornave a cjapâ il so puest dongje dal jet. Tal tinel, lu spietave la sûr.
“O soi un coiar. Ducj chescj agns, e no mi soi mai presentât prime”.
“Tu vevis il to ce fâ. No sta pensâi”.
I metè denant un plat di gnocs e i segnà une pignate. “La mame e veve bisugne di straviâsi. Ti à fat i articjocs. E je ancjemò convinte che tu ledis mat par lôr. No si vise trop che tu ti sês vergognât cuant che tu âs menât culì Marina a cene pe prime – e ultime – volte, a viodinus ducj a supâ i dêts e a meti te terine lis fueis rumiadis. No tu sês mai stât come nô, di paîs”.
I poià la man su la spale: “Tu sês simpri stât il lôr orgoi”.
Vie pe gnot, la mari lu clamà. “Al à domandât di te”.
Al varès vût cussì tantis robis di dî, invezit, al restà fer, i voi a spieglâsi ta chei dal pari, fin che il vieli ju sierà par simpri, i lavris voltâts intune espression serene. Tal indoman, al jere a Milan. I saressin volûts un pâr di dîs pal funerâl e, come simpri, sô sûr e veve za parecjât dut.
Tornade di vore, Marina lu cjatà in cusine. Le imbraçà. “Tesoro, perché non mi hai avvisata? Tommy arriverà fra un paio di ore. Ti preparo qualcosa”.
“La cena è solo da riscaldare. Vai a cambiarti, anche tu sei stanca”.
Chê sere, la famee di Marc e de il benvignût a un plat gnûf, che al sarès tornât dispès su la taule: articjocs riplens, ae maniere de none.
di Fuguline
#822
3 comments On Articjocs
Cualchi volte, a cualchi storie, ti pâr che si puedi gjavâ cualchi peraule, e che la storie e resti biele compagn. Cualchi volte no. Vuê us publichin une conte bielissime. Une conte che e veve di partecipâ al contecurte day di doman di sere, ma jere masse lungje. 2600caratars. Ostîr gjave tu, i veve dite la Fuguline, la nestre Coghe de Ostarie. E lui i à ancje provât. Al è rivât a 2400 batudis e dopo si è rindû. La storie e veve di restâ come che e jere. E magari doprâle vuê, par dîus a ducj che la nestre Coghe, îr e à vût un frut. Agnul. Il nestri contecurtâr plui zovin. E no, cirìn di capîs, no si clame Angelo, ma Agnul. Parcè che e je ore di riviel, e la nestre Coghe e à decidût cussì, E alore, noaltris de Ostarie ju Saludin, jê, Denis e soredut Agnul, cun cheste conte che e je perfete, intai timps, intes peraulis, e inte sielte di personaçs e azions.
La storie, si sa, e je vecje tant che l’om. Une storie di rimuars, di timps che no tornin e che no si son gjoldût. Dopo… tu puedis ancje mangjâ articjocs par il rest de vite, ma ciertis robis no tes torne nissun. Leieile, in chest 25 di Avrîl, che ancje la libertât, e je une di chestis robis.
Bielissime conte. Une bussade a la coghe e al ultin rivât te osterie!
Pingback: La Briscule des Striis – la croniche | Contecurte ()