fbpx

La Briscule des Striis – la croniche

A son seris di Istât come chestis, cul cjalt che al smavîs a planc e il Scûr platât jenfri i arbui che al brame di vignî a viodi ce che al sucêt e soredut, cui che al vinç la partide. La partide che si zuie tai cjamps, magari li di un Mulin, come il Mulin di Tilio, dula che il len si messede ae aghe, dulà che il savê dal om si messede a chel de nature.

La partide e je di cjartis e a zuiale a son lis striis. Ma striis ‘nd è tantis, e chês cuatri che si dan bataie a son chês che a incjarnin il spirt dal puest dulà che si zuie, ven a stâi, tal nestri câs, il Friûl. E cui isal cussì fortunât di podê contânus une di chestis partidis? Cui isal cetant braurôs di spiânus cemût che a zuin e cemût che e va cheste Briscule des Striis, dulà che si decidarâ cui che al paronarà par dut il an che al à di vignî?

Forsit lui, il nestri galantom cu la paveute tal cuel, vistût di neri, che al un dai pôcs che al à vût la fortune e la aventure di passà la gnot a viodi la partide di cjartis, che po, nus dîs, briscule no je, parcè che lis striis a zuin cun cjartis particolârs, che a àn pituradis lôr cul sanc di sbilf e il frusign dai fûcs che a sflandorin tai lôr bai. E lis cjartis no podês viodilis, ma se a podessis viodilis a viodaressis che a son cjartis che a rapresentin lûcs, o creaturis, o imprescj o adiriture dome peraulis… peraulis magjichis che a fasin la magjie dal discomparî, parcè che no li dopre plui nissun. E a ogni cjarte zuiade e salte fûr une conte. Lis cjarticontis, lis clamin lis striis…

La prime e je la Strie dal Lavôr. Une striate sclagne e gnervose, simpri critiche cui cambiaments ma pronte a pleiâ la schene se al covente. Une strie che e sa fâ l’incjantesim dal robâti timp e metisi devant di robis ancje plui impuartantis di jê ma che je e rive a fâ someâ picininis.

Doprant une sape tal puest de scove, e je rivade prime di chês altris. Simpri compagnade de Strie de Fature, simpri che e trafiche o masse strache par zuiâ la partide, la strie dal lavôr al è agnorums che zuie  cheste briscule, in Friûl, e nus à zuiât cjarticontis come Se ti perdi tuo danno e Articjocs.

La seconde strie e je une striute picinine, plene di fantasie. Une strie che e je parone di dutis lis creaturis dal Friûl, sedino bestiis, sedino altris, di chês che no si viodin come i orcui, pronts a tignî par jê e a businâ di daûr, o lis aganis. Ma si sa che ogni timp al à lis sôs bestiis, e lis bestiis dal Friûl a son cambiadis, e tantis a son parfin sparidis.

E alore ve li che la Strie des Creaturis, cu la sô cjapiele balarine, rivade nuiemancul che parsore di une bestie dintone che cuissà dulà che le à tirade fûr, è à zuiât cjartis dulà che e jere parsore une Pudiese o une ome che al pareve une femine o no si sa c’è. Di li e à tirât fûr storiis come La storie di Semre e Tal jet di Gregorio.

La tierce strie e jere invezit li di simpri. La Strie che e à zuiadis dutis lis brisculis di cuant che al mont. La strie plui viele di dutis, che di dut e di ducj e sa. La Strie dal Dulà, ven a stâi dai lûcs, sedino de nature, tant che un bosc un foran, sedino dal om, tant che un cimitieri o un cjast o un camarin o une tieze. E je rivade cu la sô sporte dulà che al jere dissegnât ogni dulà dal mont, compagnade di une striute plui piçule, la Strie dal Vuê.

Ve li che cheste strie al capite che e sielzi cjarticontis come un puint, cetant impuartant intun Friûl o un cjampanili, centri di un paîs che a al cjale ducj di adalt. Di li a son saltadis fûr storiis come L’ultin e Cjampanii.

E par ultime, a proposit, e je rivade la strie che mancul a veve voie di zuiâ la partide. Une strie che je rivade sul sô baston e che si è lamentade che se pûr jê no varès volût vê nuie a ce fâ cul Friûl, di agnorums a levin indevant a clamâle a zuiâ… la Strie de Sotanance, insome, e à scugnût vignî  parcè che chi, e à dit, muart un paron a fasin un altri.

Une strie che a moments e someave puarete, buine, cidine, e a moments e vosave di chês tonadis di fâ vignî i pei drets ai orcui. Lis sôs cjartis a jerin cjartis fatis dome di peraulis… cjarticontis dulà che a si podeve lei Cuinçâ, Blec e Glagn… o pûr Salacor, Sbit, Inniò e Calumâ… E di li a saltavin fûr contis tant che la Bibliocheche o Travuart Eclesiastic.

Insome… una partidone. Ae fin però, chel cu la paveute no nus à nancje spiât cui che al à vinçût… al à dit che si jere imberdeât un moscjon te sô tele e al à scugnût scjampâ vie a proviodi, che li al veve gustâ e cene par almancul une setemane. Cuant che al è tornât, dutis lis striis a jerin bielzà scjampadis vie.

Nus à lassât però une rarissime imagjine di dutis lôr, comprendude la Strie de Fature, in bande di lui e la Strie dal Vuê, in braç a la Strie dal Dulà. A cumò… cul mês di Otubar che si svicine… us saludin! A la prossime briscule des striis!

__________________

In ordin di aparizion, o vês podût viodi: il rai contestoriis (L’ostîr, Rafaêl Serafin), strie dal Lavôr (il famei Checo Tam), la strie des Creaturis (la Massarie Margarite Cogôi), la strie dal Dulà (la Coghe, Serene Fuguline), la strie de Sotanance (il Berlon, Michêl Londar), la strie de Fature (la Sartorie, Astrid Virili) e la strie dal Vuê (Agnul). Un grassie ancje a la strie des Vuicadis (Marta) e al strion dai Biscots (Pauli Jacuz) che insiemi cun chei de associazion dal Mulin Braide e cu la poie dal Comun di Talmassons nus àn judât a meti impins une bielissime serade.

Note: nissune strie e je stade ofindude par meti adun chest spetacul.

2 coments On La Briscule des Striis – la croniche

  • Biele le compagnie, maraveose e grande le sielte dal lûc, un vieri mulin nol podeve prestasi miôr a che magnifiche manifestazion di ” briscule striade ” , e grant, tant grant il displasê di no vê podût partecipa a che simpatiche e indivinade presentazion. Lussian

  • MA cumò tu podarâs viodi ducj i video su fb che o metarin sù planc a planc

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: