Cjampanii

Il prin cjampanili a scjampâ vie al fo chel di Sclaunic. 
Si jevà sù intune gnot di aiar e stelis, gjavant fûr i modons grandonons dai cjantonâi des fondis, cence fâ neancje un rumôr. In maniere dal dut scognossude a cualsisei leç de fisiche si pleà, cuasi dismolantsi, a impirâ il scûr come un madrac di clap. Al tacà a cjaminâ jenfri lis cjasis, rompint il cidinôr de criùre nuie altri che cun cualchi grignelut di piere, rodolât sul pedrât fin a jemplâ lis sôs grispis a cuadretuts. Parfin lis cjampanis, sbalotadis a planc, a parevin tignî dûr il batecul tant che un dêt madûr, lontan dai arcs di piere. 
Dopo di lui a faserin compagn il cjampanili di Listize, di Talmassons, di Cjasteons, di Vuirc, di Bertiûl, Flambri, Pozec, Basilian, Codroip e indenant cussí, da pardut, comprendûts chei paîs spierdûts pe basse come Cjarmacis o la Plêf di Rose. A cjapavin ducj la vie dai cjamps, fermant di bot i orlois, o lassantju libars di cori, talpassant cumieris, spaurint civuitis e barbezuans. Juste chel di Mortean, imberdeât pe sô struture di pandolo, al menà un pocje di zarde in plui, sdrumant cualchi pincarel e un pâl de lûs.
E no si podeve dî che no ju ves viodûts nissun.
Gjeremie, che par lavôr al leve simpri a durmî di straoris, i vignî un inzirli e si fasè une camomile; Nelo, pene vignût cjase de buteghe, al prometè su ducj i sants dal lunari che al varès molât il bevi; Lussie, pronte par lâ a fâ il turni di gnot, e molà une vuicade ma intun marilamp si convincè di vê viodût mâl. 
Insome… nissun al pues pensâ che i cjampanii si stufin di stâ tai lôr paîs. 
Il davoi, di fat, al saltâ fûr dome la matine dopo, cuant che aromai a jerin ducj tal mieç de campagne, un dongje di chel altri, cui dret, cui stuart, cui a tignî alte une crôs e cui un agnul. Di lontan a parevin un riç grandonon, plen di spinis spiçotis, che al meteve in vore un tananai di cjampanis se cualchidun al cirive di lâi dongje.
In bande dai dibatits e de maravee, in pôcs si inacuarzerin che al jere pardabon di ridi, a pensâ che propit il cjampanili, mestri e paron dal tignî unît un paîs, al fos deventât cussì intolerant di no rivâ a sopuartâ plui i oms e lis lôr barufis.
di Raffaele Serafini
Contis dal Ostîr

2 coments On Cjampanii

  • Rafaêl, par gno cont a son stâts i pulinârs des televisions a dai il colp di gracie, ma ancje lis antenis de rêt celulâr ch'a i àn montadis in ponte a plui di cualchidun; pense dome a lis stupiditât ch'a scugnût sintî e viodi cence volê. Bepi

  • a mi pareve propit di viodiu a talpassâ lis cumieris dutis in scuare, e ti crôt che a plui di cualchidun i à vignût un zirament di cjâf: mi plâs une vore la tô fantasie intal meti adun li senis come intun dissen animât. T'a le invidiei, parçe jo no viôt plui in là dal nâs…

Scrîf un coment

This site uses Akismet to reduce spam. Learn how your comment data is processed.

Site Footer