La Bibliocheche

Se o cjapàis la strade blancje che e puarte fûr Talmassons, viers la glesiute di Sant Antoni, e o puartàis i pas te boschete pôc plui innà, cirint di meti il cidinôr te suele, la maravee tai voi e l’inniò tal cjaminâ; dopo vê passade la roie – svindic di risultive cuintri la canicule – a rivais adore a cjatâle, e salacor ancje a fevelâi.
Ducj a san che je li, che no je mai lade vie e no je mai rivade.
In pôcs però la viodin e in mancul i crodin, parcè che dopo vê sintude cheste storie, come da rest par ogni veretât de vite, no spindin fature par lâ a viodi se je vere pardabon.
La Bibliocheche no si cure di cheste pocje curiositât de int, no si cruzìe de pocje fidance.
Jê e vîf dal so savê, dal so vê let ogni libri che al è in chest mont.
Simpri. In ogni moment. Ducj i libris.
Nissun al sa cemût che al sedi pussibil, ma al è cussì, e cussì simpri al sarà.
E dentri tai libris si cjate dut, e dut si pues domandâi a la Bibliocheche.
Bisugne dome vê la gracie di poni la domande disint dîs voltis dîs, a ûs ridade di simie.
«Dîsdîsdîsdîsdîsdîsdîsdîsdîsdîs Bibliocheche, cuâl isal il non dal diaul?»
E li, cuntune domande cetant incaute, si pues pierdi zornadis, par che jê ti conte de Bibie e di Dante, di Bulgakov e Göethe, di esorciscj e infiers. Fintremai che no tu ti stufìs. O tu muris di fan stant a sintîle. No sarès la prime volte che al capite.
Par chest bisugne stâ atents a lis domandis di fâi.
Cui aial robât lis trisculis tal ort? Cuâi numars vinçarano la loterie? Tite mi vuelial ben?
A son dutis domandis di no fâ. I libris a son te vite e no l’incontrari. La Bibliocheche si sfantarà intun baticei di plumis, lassantji a cjalâ il vueit tant che un cocâl. No sarès la prime volte che al capite.
Parcè che rivâ a cjacarâ cuntune Bibliocheche al è biel, maraveôs. Ducj a podin.
Ma o vin chel brut vizi di poni domandis che no àn rispueste, o che la savìn za, o che no je impuartante. E je e sparìs cussì sburide di lassâti crodi che no sedi mai esistude. E magari ti robe ancje un sbit di fantasie.
No sarès la prime volte che al capite.

di Rafaêl Serafin

 

3 coments On La Bibliocheche

  • E ve chi che o sin, rivâts insom dai cuatri finaliscj dal Contecurte Day. Il prin al jere propite il nestri Ostir, che al à pensât ben di meti dongje une sorte di flabe morâl nade di un zûc di peraulis che i à fat vignî une idee… E si sa, cussì ogni tant a nassin lis contis. Il puest, al esist pardabon, e cuissà, magari di chês bandis si cjate ancje une bibliocheche… e alore…dîsdîsdîsdîs….

  • No je ostarie che dedi fûr vin miôr de nestre.Cheste volte il nestri ustîr al à volût servinus in manecis blancjis, e cjaliçs di arint, par un vin di preseade cualitât, indulà dopo velu glotût al sta di induvina le so provenience. Di dulà no puedial jessi se no tant da lis preziosis, cuotadis, vignis dal nestri Friûl, cul non di Sant Simon a Codroip, Scerbanesco a Lignan, cence zontà tant’ altris cussi ben vendemadis de so pene, e cun tante nestre sodisfazion a sei aventors di cheste preseade ostarie . Lussian

    • Tu sês il top commentadôr di dute la Ostarie! Se no ti vessin bisugnarès inventâti.
      🙂 Ma par fortune ti vin! 🙂

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: