CC24Avrîl#14 – Amen

#14 – Amen

Ma dulà seso scuindûts? Platâts dentri de vuestre bombâs tant che cagulis ingrimpignadis jenfri di un nâs! Scoltait le vôs che us coione, il berli neri di un Totolò che us tontone. Sorestants cul cûl su le sente! Prepotents di ogni sgjarnassie, che o pensais di vele fate simpri francje, cu le benedizion dal vuestri diu che us benedìs, îr, vuê e doman ancje. Braurôs dal carantan che us jemple le borse. Barons, Imperadôrs, Vescui e Bonsignôrs, che o mangjais fintant che si implenais le vuestre panze. Politicants cence ideâl, cul pêl alt sul stomi, plui lunc di chel ch’al pice dentri al cûl di un animâl o dal demoni. Parons di pâs e di vuere, di maluserie e di tristerie, voaltris riverîts che o segnaits i confins cul sanc dai fiis, mai dai vuestris, cul berli da lis maris, cu le maledizion dai Paris. Sigûrs dentri dai vuestris cjscjei, o pensais di jessi a puest, di jessi simpri i plui biei. Sot de sede dal vuestri vistît o pratindeis di jessi riverîts. Dal tibiat, dal biât, dal muart di fam, dal scudulât. Ma al vignarà, une buine volte, il folc che us savolte! La man di un Vilan che us sdrume tal pantan. Che le maledizion de Storie us compagni cence remission fin su le buse dal cimitieri, là che Siore Muart, le uniche e ultime rivoluzionarie, us strissinarà come sclese di veri sot di une clapadorie. Ultin vêr svindic dal Puar cence glorie. Amen.

di Angelo  Floramo (Torototele)
#1612

2 comments