A jerin perfetis: la Tyrrell blu, la Lotus nere, la Hesketh blancje, la Ferrari rosse e la McLaren rosse e blancje. Dutis cu la caroçarie a puest, cui sponsor e… lis rovedis no jerin cuatri ma dome une! Sì, a jerin cariolis trasformadis in machinis di F1 ta chel mês di mai dal ’75 cuant che si disputave il GP di Montecariol a Samardencje di Puçui.
Al jere un om che al faseve la cronache, tipo Mario Poltronieri e e jere parfin la bande cul nestri Toni che al sunave il sax. Toni al veve dodis agns e al jere meticolôs. Si domandave parcè che il cronist de gare al inventàs i nons dai pilotis. “Ma se a son dome cinc? Ce strambolotial? Al tire non a câs…” al diseve tra se Toni.
“I nostri migliori piloti” a jerin feminis cun tute e casc dentri de cariole, sburtade di oms robuscj, ancje lôr in tute e casc. Insome, une robe perfete chel GP. E a la fin e jere la premiazion cun tant di copis. Ma Toni no si tignive plui, al veve di fâ une grande pissadone e nol olsave domandâi al mestri de bande di fâ un salt tal bar dongje par vuadagnâ il cabôt. Ta chel il mestri al tacâ la marce “Autocentro” e Toni nol rivà plui a tignîsi e le fasè intor. A la fin de marce la biele flautiste Cinzia, bionde e riçote, si jere zirade e lu veve viodût dut imbumbît tai bergons. E jere tacade a ridi come une mate! Di colp ducj i altris sunadôrs a vevin tacât a ridi di Toni, cjapantlu par “velu-velu”.
Vuê Toni al è lât inte sofite e al à cjatât dai modelins di machinutis che tai agns ’70 al veve comprât par corispondence cul catalic VESTRO. A jerin lis stessis marchis di machinis che al GP di Montecariol di Samardencje a vevin trasformât in cariolis. I è tornât dut iniment. Si lamente parcè che al varès vût voe di vê un ricuart di chê strane gare. Se a vevin fat cualchi fotografie. Cui lu sa? Intant a son i modelins e il ricuart te sô ment, un cualchi zone dal çurviel… Cinzia, la pissadone, Autocentro, il vieri mestri e altre int invecjade o che no je plui. Modelins di machinutis a ûs la “madalene” di Proust…
A duarmin intune casselute di len, di chês dal brandy. A àn pierdût cualchi aleton; une e je dute ossidade sot. Il timp al passe. Il mont al è cambiât e ducj si sin sierâts dentri. Tignìn cont i nestris ricuarts. In timps bruts come chest che o stin vivint a son une sigurece…
di Checo Tam
#975
2 comments On Montecariol
Spetacul! Bielissime!
Bielonone le conte dal Checo a fa rivoc di timps lontans cuant lis oris vignivin dopradis si par lavôr, ma ancje, e tant, par distrai le melonarie in ativitâts di svago, e in chei agns le fantasie e jere a bon presit di podê spindi a voi sierats. Reste le bielece das sofitis, dai granârs, che ogni volte tu vâs in lôr ti ripuartin timps lontans a indulcî sul cûr, e come ch’al dîs il Checo vinci le tremebonde situasion corint. Lussian