Il mus di Tite

Tite Sacoman di Gnespolêt al veve la cuarte elementâr. Famee di contadinuts, a rustîsi di un soreli al altri pe campagne a pro de puare bocjade.
Fantat, al domande di jentrâ cui carabinîrs e si presente, di vincj agns, a Moncalieri pe visite di jeve.
Cjase, il dì prime, al veve folât cui pîts intal brantiel la vignute dal bacò, un vin neri e penç come l’ingjustri, e ducj ridi tal doman a Moncalieri, crot, ae visite di jeve, tal viodilu di doi colôrs e neri dapît in sù fin al balonat.
Ma lu àn fat bon distès. Tant bon di mandâlu a Rome, carabinîr a cjaval e fintremai adet ai cjavai di Starace, segretari nazionâl dal Fassio, biel e dut tirât parsore di cjavai di gale, a cori e saltâ daûr Starace.
Un timp in glorie, svolât vie tun amen, cul vot di setembar dal cuarantetrê cuant che, te caserme dai carabinîrs a Rome, a jentrin i todescs sui cjars armâts e Tite al va a patî fam e netâ maseriis in Gjermanie.
Tornât dopo la guere a fâ il carabinîr, Tite si impense come tun sium dai siei cjavai, ma la zoventût e il timp di Starace i son scjampâts par simpri vie di man, al comence a pensâ cjase e, subit che lu lassin lâ, al va in pension.

Voltade pagjine, e tache alore cumò la liende di Tite Sacoman cul mus. Pe precision, dôs mussis, che lu judin a lavorâ i siei cjamputs.
Ma di cjaval a mus nol è tant pete che dai. Un mus al à il sens de mansuetudin, de pazience, de laboriositât, ma no de sotanance. Al ubidìs se al dîs lui di ubidî. Lis cjape, ma nol mole se no je reson. Al cognòs e al à rivuart pal so paron, ma no sudizion.
“Ho detto vaaa!” Tite ur businave aes mussis par talian, tornât di carabinîr, e lôr magari invezit a morestavin subit il pas o fintremai fermâsi, daûr il lôr pensâ.
Pe campagne, la int lu sintive eresiâ a distance, saldo par talian, cu lis mussis o magari cu la femine, che e veve cjapât ancje Marie ben e no mâl dal mus.
Lis mussis si molavin ogni volte a dute corse, tornant cjase la sere de campagne, man a man che si faseve dongje la stalute tal curtîl dal Blanc, dulà poiâ la strache e gjoldi une grampe di foragjo. Ma si tratave di imbocjâ a misure il volt dal lôr puarton, di no lâ a sbati.
“Staaa!” ur businave Tite orcolant sul cjar. Fin che, une sere, pe primure, il cjar si è incjastrât a mieç puarton. Tite alore al salte jù come un danât, crustantsi lis conolis pal gnervôs, al cjape une musse par une orele a plere e i busine dentri “Ho detto staaa!” Intant lôr dôs, cidinis, spietâ cun sante pazience che si cuieti e i passi la fumate.

di Ivano Urli
#976

1 coments On Il mus di Tite

  • Simpri bielis lis contis di Ivano, prin pal fat che son fondadis su le vite di une volte, che a mi tant mi plâs cognossi, indulà ti scuvierzin dut il mût di vivi di che puare buine int, e po dopo pe lôr sostance umoristiche che puarte le voie di ridi cul bon umôr. Lussian

Scrîf un coment

This site uses Akismet to reduce spam. Learn how your comment data is processed.

Site Footer