27 di Zenâr dal 2024

Gruesse Sorprese

Gjalarian, ai 27 di Zenâr dal 2024
Spaccio Raffl

Nol è doi, cence il tierç, si dîs. E noaltris o vin rispietât la detule, stant che dopo dal spetacul dal Cocecurte Day e di chel da Lis aventuris di Lupo Manarie, che a jerin vignûts une vore ben, o vin pensât di fâ un altri spetacul intal Spaccio Raffl di Gjalarian. E cussì, cundut che o vin cjapât un pôc di frêt, si sin fats consolâ dal odôr di miluçs pene cjapâts sù e o vin butât vie lis brenis dal Ostîr (come che ant ves, po) per meti impins un spetacul dal dut su la fonde de CorseCurte.

Eh sì… la CorseCurte24, partide propit a Zenâr, ma stiçant la int cu lis contis de CorseCurte22, La stagjon des contis che si è davuelzude inta chel an e che e à burît fûr passe tresinte contis dilunc di 12 mês. 

E l’Ostîr ce no ti ajal fat? Al à pensât ben di meti adun un libri! Sì, e jere cheste ca la gruesse sorprese che al tignive platade e che al à metût adun intun pâr di mês par ducj i siei contecurtârs, ma soredut par chei 19 che a son finîts dentri de PRIME RACUELTE DI NARATIVE CURTE FIRMADE DI UN COLETÎF.

Ma sì! Parcè che cheste e je la gnove dentri de gnove. Il libri La Stagjon des Contis – CorseCurte22 al è part di une golaine e al ripuarte come autôr “Contecurte”. Un libri scrit di une Ostarie! 

Te grande scjate che la gjatemarangule e veve prontade, sfodrade di mus colorâts e cuntun floc plen di omenuts che a corin, a jerin nuiemancul che 100 copiis dal libri, fresc di stampe, che al cjape dentri 60 contis curtis, cualchi imagjin a distacâ i mês e lis filastrocjis di introduzion dal Ostîr. Ma viodìn di fevelâ dal spetacul!

Eh… il spetacul al è stât une fieste! 
Une fieste plene di sorpresis. 

O vin letis une biele grampe di contis, tant par scomençâ. Pasche di bondance e ligrie di Rudy Citòs, No respiri di Alessandro Valoppi, Il tai di Checo Tam, Il pestel di Laurin Zuan Nardin, La cjase de lontanance di Astrid Virili, Bundì di Margarite Cogôi, Catans intal cûr de Fuguline. E tal mieç o vin intervistât i autôrs di chestis contis e ancje i zurâts Carli Pup e Zuanluche Franco. 

Dut ca? Ma ce! O vin presentât il gnûf social di Contecurte, il canâl Instagram, gjestît di Alessio Ecoretti, Peteçon di Contecurte. E su Instagram o vin inventât la gnove creazion dal Ostîr, lis Ontecurtis, lis contis che ti restin intor come une magle di vueli. 

E o vin ancje comunicât a sorprese che Contecurte e à pene fat i agns! Nuiemancul che 15 agns, une cifre tonde par une torte galatiche che Sara dal Spaccio Raffl nus à regalât e che e restarà impresse tai voi di ducj chei che le àn mangjade.

E o vin ancje finît di numerâ lis contis de Ostarie, comunicant che propit in chest mês di Zenâr o vin cjapât il numar 1500… une medie di 100 contis ad an!

La serade e je stade une vore informâl e jenfri il public o vin vût il plasê di vê une buine grampe di autôrs de CorseCurte22. Di Pierina Gallina a Renzo Turùs, de Maghe Olstrele al Massim Furlan, e cun di plui o vin vût plui di cualchi gnûf partecipant ae CorseCurte24. Par no fevelâ dal colegament fat dilunc dal spetacul cun Noemi e Eduart, e dal public che nus cjalave su la direte FB, cun dentri dal sigûr altris autôrs come Lenart Gjavedon, Zorç Cesaratto, Marcelo Del Mestre e dal sigûr altris.

Ma no je finide, eh. Dopo vê brindât e mangjât la torte, in vincj di nô o vin pensât ben di lâ a une super cene là di Pituel, a Talmassons, par finî la serade in bielece.

Ce vino di dî? E je stade une serade emozionante, che o sperin che e sedi di bon auguri pe gnove CorseCurte e par un altri an di iniziativis di Contecurte!