Cocecurte Day a Gjalarian

Gjalarian, ai 29 di Otubar dal 2023
Spaccio Raffl

Il Contecurte Day, la gare di contis dulà che no si sa cui che li à scritis e al decît il public, al è aromai une usance, inte nestre Ostarie, ma al pareve propit che si les a dismeti, stant che tal 2022 si veve mudât inte Corsecurte, e ta chest 2023, un pôc plui avâr di contis, al jere rivât Setembar e ancjemò no lu vevin vût iniment.

Ma al è capitât intune matine che l’Ostîr al è lât li dal Spaccio Raffl, di Gjalarian, a comprâ i miluçs, che a viodi chel biel puest cussì larc i veve vignude la moscje al nâs e…

E nie, podês ben imagjinâ come che e je lade, un biel event a Otubar, stant al periodi cun contis di pôre o che almancul a son in teme di gnot de Vilie dai Sants, plene di tradizions, come che nus insegnin Lis Contis dal Mês, e un non super induvinât, il Cocecurte Day. E cussì o vin jemplât il Spaccio di Cocis, di cjadreis colôr coce, di lumins, di lusôrs ma soredut… di contis!

La gare le cognossês, une dozene di storiis, letis dai nestris letôrs (Berlon, Sartore, Famei e Mestri) e un public munît di paletis a forme di coce, dissegnadis de gjatemarangule, e cun daûr une contecurtute, scrite dal Ostîr e di cualchi altri contecurtâr. Risultât? Un spetacul!

Sì, bon, che al jere un spetacul lu vês capît, ma e je saltade fûr pardabon un spetacul di serade, insiorade de Massarie e de Cjantore de Osterie che a àn musicât ogni jentrade des contis, e di une leture finâl improvisade, cul Muini, la Cjantore e la Massarie che a àn let lis trê finalistis: Esse, La cantine, La barete, scritis di Astrid Virili, di Massim Furlan e di Laurin Zuan Nardin. E chest al è stât ancje l’ordin di arîf, che al à nominât pe seconde volte (ma la prime in cjar e vues) la nestre Sartore campionesse di contis (che si è puartade cjase chel biel zei ofiert dal Spaccio Raffl).

L’Ostîr, come che si conven, al à presentât la robe, vistût come un pipin, e al à mantignût i contats cun Lupo Manarie, che insiorade di un dissen di Ricart e Jacum, al à regalât ae Ostarie une des sôs storiis strampaladis. E tes paletis a jerin ancje des contecurtutis ineditis che no son stadis letis dilunc de serade ma che us regalin in cheste pagjine. Par no fevelâ des cocis intaiadis, che a fasevin biele mostre dapardut (cjalait lis fotografiis!).

Ma chest al jere parcè che al intigneve al spetacul nût e crût… ma lu savês, a lis fiestis di Contecurte ce che al conte nol è chel, ma il gust di vê fat alc di biel insiemi e achì il gust plui grues al è stât chel di vê vût une sale plene di int (lis sessante e passe cocepaletis che o vevin preparadis no son bastadis!) e soredut une serade passade a mangjâ dut il ben di diu che la mari dal Ostîr e Sara e Ivan, titolârs dal Spaccio, a vevin preparât. Cun dut che o vin tirât dongje, in cheste ocasion, ancje un pocje di int gnove, che nol è mai un mâl, par une Ostarie di contis curtis par furlan, che la int tu âs di parâle dentri a pidadis ancje se il bevi al è dibant.