CorseCurte#18 – La cjase de lontanance

 

#18 – La cjase de lontanance

O soi vignude a stâ te cjase de lontanance, dulà che il timp si è fermât.
La cjase e à cuatri puartis: cuant che e je ore di lâ vie no bisugne vê intrics, e ancje barcons grancj par cjalâ il mâr e il cîl.
O ai picjât il to ritrat parsore il jet cui bleons blancs.

Ogni matine o cîr di visâmi un particolâr di te: une sclese dai tiei voi, il to mût di ridi, chel çuf di cjavei che nol sta mai a puest, e o pituri un altri ritrat.
Lu picji sul mûr dongje di chei altris, e dopo ur volti la schene e pal rest de zornade o cjali il mâr.
Mâr vert che si rondole, mâr scûr che si sdrondene, mâr celest che si confont cul cîl.

Un dì l’aiar al puartarà un sbrendul di vele, o la corint un ramaç slissât framieç des slavaris di un flum. Al sarà il segnâl.

Te sporte o metarai dome ce che al covente par partî: un tabâr pai dîs di buere, un cjapiel par la canicule, une buracje cun aghe di risultive. Pan e miluç a bastaran di mangjâ.
O larai vie e o lassarai dutis lis puartis viertis, i barcons spalancâts.

I tiei ritrats, un plui smamît di chel altri, a restaran sul mûr.

di***
#1***

1 coments On CorseCurte#18 – La cjase de lontanance

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît