O vin sierât l’an cuntun super spetacul che nus à fat cognossi Lupo Manarie in cjâr, vues, manarie e rugnadis, ma soredut o vin metût impins la gnove CorseCurte24, un laboratori di scriture par furlan che al dure un an e che al sarà nuiemancul che une farie di narative curte, par une gnove bugade di leterature furlane.
Ma lu savìn, o vin ancjemò tancj indecîs, là di fûr, sedi jentri chei che a àn partecipât ae CorseCurte22 e no crodin di vê timp e voie di tornâ a jentrâ in chê aventure, ma sedi e soredut fra chei che no san ben di ce che si fevele, e magari i plasarès partecipâ ma… sì… boh… mah…
In sumis. O vin pensât di risolvi la robe par ducj cuntune GRUESSE SORPRESE! E trancuii… no fevelin de viere conte di Pieri Moràs, amì e compagn di mirindis dal nestri Famei. O fevelin propite di une gruesse sorprese che o tirarin fûr (no, no… no in chel sens) dilunc di une Super Serade di leturis e fieste e ancje une cene subit daûr.
Ma anìn par ordin. La robe plui impuartante e je la serade, a ore di aperitîf, sabide ai 27 di Zenâr (a mancjin ancjemò 4 dîs ae fin dal mês), tor 5 sot sere, li dal rodât Spaccio Raffl a Gjalarian, fevelarin de CorseCurte22 cunt tancj protagonist di chê Corse. O leiarin cualchi conte di gale, o spiarin cualchi truc di scriture o par disvoluçâ la creativitât, e il nestri Ostîr al sarà a disposizion par rispuindi a dutis lis domandis su la CorseCurte24.
E je une serade par stiçâ chei che a son ancjemò indecîs e par sclarî i dubis a chei che si son iscrits di pôc, ma ancje par motivâ e stiçâ lis vecjis bolps de narative furlane, che magari a podin fâsi cjapâ di un pocje di sflacje.
Ma al sarà ancje un biel spetacul di leterature curte furlane e par furlan di cjalâ e gjoldi ancje par cui che no i free nuie di scrivi, ma dome di scoltâ. (E po un tai ae fin lu bevin, dai)
E po… come che us vin dit, o varin pardabon une GRUESSE SORPRESE, che l’Ostîr nol à ancjemò spiât a cuasi di nissun e che o podês viodi lì, in chel grant pac regâl tal mieç de locandine che ai 27 o vierzarin ducj insiemi.
Si che duncje…
Volêso vignî a sintî une biele grampade di buine narative par furlan?
Volêso vignî a scuvierzi cuale che e je la gruesse sorprese de CorseCurte?
Vêso domandis o dubis su cemût frontâ la gnove CorseCurte24 che o sês iscrits?
Sêso ancjemò in dubi se iscrivisi o mancul a cheste grande competizion leterarie?
No vêso la minime idee di ce che je la CorseCurte24 di cui ducj a fevelin?
Us plasial lâ ator dome par bevi un prosecut a gratis?
Sêso curiôs a manete di savê ce che al è dentri ta chel pac?
Se a jentrais intune di chestis categoriis, ben po, o sês invidâts a vignî a chest spetacul, se no altri par podê dî, ca di cualchi an, che cuant che e je scomençade la gnove budade di narative furlane curte voaltris o jeris presincj! Us parial nuie? E se us ven il mat di ficjâsi dentri… al mancje ancjemò cualchi zornade ae fin dal mês…
E o zontin ancje che par cui che Chei di Osterie a laran a cene là di Pituel, a Talmassons, subit daûr de fin dal spetacul. Par motîfs organizatîfs però, se cualchidun al vûl zontâsi, al è di dâ la conferme dentri di vinars di sere ai 12 di Zenâr, almancul in maniere indicative… dopo si cumbine dut che o sin adore.
Vonde cheste gnove, par vuê. E us visin ancje che… la CorseCurte24 e je in plene… I prins mus de prime tape a àn tacât a cori!
