Lis aventuris di Lupo Manarie – La Croniche

O vin propite di dî che o sin stât ducj contents e emozionâts. Parcè? Ma cemût parcè!? Pe prime volte o vin vude la ocasion di viodi Lupo Manarie in cjar e vues, intun spetacul, e fintremai intal ultin moment che al è saltât fûr, cu la sô manarie e il so pêl plui ruspi di une piore cragnose no si jere sigûrs. Da rest… no altris lu vevin cognossût dome intune conte, e dome l’Ostîr al pâr vê amicizie cun lui, tant al è che al dîs che si viodin ogni dì!

Ma insome… o sin ca par contâus de serade, la prime che noaltris de Ostarie o vin pensade pai fruts, e fâus viodi alc. Scomencin cun cheste foto che us fâs capî bielzâ ogni robe… ven a stâi che Lupo Manarie, cundut che dilunc dal spetacul al voleve mangjâju, (un adiriture al voleve frizilu e impanâlu) no i à fat pôre (o cuasi) e ae fin a àn volût fâsi la foto cun lui, denant de senegjature galatiche che e veve fate sù la nestre gjatemarangule.

Gjatemarangule che par fortune che e jere a fâ di assistente, assunte dal Muini de Ostarie, che al à introduzût la serade e fat jentrâ Lupo Manarie, che tant par meti in clâr lis robis al à fat capî che al jere lui la Star de serade, e di fat, ducj i fruts a savevin il so non! Il meraviglioso, galattico, insuperabile, simpaticissimo ecc ecc… Lupoooo Manarieeee! 

Pecjât che chel simpaticon al veve sì sielzût lis contis, e al voleve ancje leilis, ma lui lis sa lei dome in lupese, e in lupese no lis capive nissun! Nancje il titul! E cundut che al à cirût di insegnâi al public a fevelâ lupese (a àn imparât subit cemût che si dîs “volante”, ven a stai uuuuuuuuuuuuuuuuuuhhhuuuh) o vin scugnût prestâi come letôrs dute la Contecurte che o vevin, a scomençâ dal Checo.

Il super famei, cun tant di tube sul cjâf, al à let une liende di divignince russe che però e pareve fevelâ di robis di chenti. E jere la storie di Lucio Panarie e de sô murose Lisa, fie de sarte Dami Gianna, e des aventuris che al à scugnût frontâ par sposâle, robant no une, no dôs, ma adiriture trê plumis al Drago di Sclaunic. Anute Panti, i Ors di Orsarie, il puar Remo… insome, al à cjatât di dut prime di rivâ al just lieto fine, cun tant di biei dissens che nus à fat vê l’Ostîr. Uuuuuuuuhhhhh uuuuuuuhhhuhhhhh hhhuuuu il titul de storie. Ah scusait, al jere in lupese. LE PIUME DEL DRAGO DI SCLAUNICCO.

Dopo al è stât il moment dai nestris Piçui Aiutants di Contecurte, Ricart e Jacum, che a vevin scrite e mandade une aventure di Lupo Manarie, che la podês lei achì su la Osterie… LUPO MANARIE E LA SÔ FERRARI VOLANTE. Ancje ca o vin vût i super dissens, la leture dal Berlon Michêl e soredut un super Barbe Zuan, il barbe di Lupo Manarie, che cu lis sôs mostacjonis lungjis lu à salvât di cuant… ma leieit la storie che al è miôr.

Dopo o vin lete une conte di une volte, di chês dulà che la none le conte ae gnece par fâle durmî. Une conte cuiete? Ma no! Une conte dulà che Lupo Manarie al à torzeonât ator de Sartore Astrid e de Massarie Margherite e par fortune che la piçule massarie si è platade sot de cuvierte che chel benedet lôf al voleve mangjâ ancje chê. La conte, cun di plui, nus le à regalade il nestri Garzon di Osterie, Gianfranco Pellegrini, cjolte e comedade propite di dentir dal sô libri. IL LÔF SU PES SCJALIS, si clamave, e tancj di voaltris si fasaran vignî i pêi drets a pensâ a Lupo Manarie che al dîs… O soi sul prin scjalin! … O soi sul secont scjalin…. e vie cussì, fin a rivâ dapît dal jet.

E dopo? Ah, ben po. Dopo si è lâts sul classic. Cun IL PAESE DEI MOSTRI SELVAGGI di Sendak, che ancje ca al è stât interpretât di Lupo Manarie, che o vin scuviert che al jere amì dai mostri selvaggi e cusin dret dal Lupo Cattivo. Robononis. La nestre Massarie, al pâr che si sedi divertude un grum a lei cheste conte e a viodi lis matuçadis di Lupo Manarie.

Finide? Ma ce! O vin vût spazi ancje par une conte dal Famei, di chês che i plasin a lui, cun aliens, astronâfs, planets che a vegnin sdrumâts e salvaments al ultin secont. E sgriu sgrau sgriu sgrau sgriu sgrau, nus à dite, e dopo al à zontât bio bao bio bao bio bao... e par fortune che in cheste FLABE SPAZIÂL al è rivât nancje a dîlu Barbe Zuan sul sô Shuttle, par puartâ Lupo Manarie sul planet Curubul, te costelazion de Blave. E i dissens che a jerin ancje in cheste conte a son lâts a finîle nuiemancul che in regâl ai fruts, che a àn zuiât al quiz, induvinant lis besteutis platadis ca e là.

Finide? Ma ce! O vin sierât cuntune conte di Nadâl, chê di Barbe Bisat, lete de nestre Sartore e soredut o vin sierât cu la mirinde e une vore di fruts contents (ancje se a dî il vêr nus pareve che i grancj a ridessin ancje di plui).

In sumis… ce vino di dî. Une vore di graciis a chei dal Spaccio Raffl di Gjalarian che in bande dai miluçs pe senografie nus àn fat cjatâ une super mirinde ae fin de serade e un graciis a ducj chei che a son vignûts, stant che si sin divertûts une vore. Ma soredut, ancje se al è scjampât vie a cirî gjai e gjalinis, un graciis a Lupo Manarie, che pardabon al è stât une superstâr!

Ve ca ancjemò un pocjis di fotos e altris lis cjatarês inte pagjine In cjar e vues.