Lupo Manarie e la lune plene

Lupo Manarie, lu san ducj, ma propite ducj, ancje lis gjalinis dal gjalinâr, ancje i cunins dal cuninâr, ancje i purcits dal purcitâr, ancje i lumins dal luminâr, ancje lis cenglis dal cenglâr, parfin il crot dal crotâr, il gjat dal gatâr e parfin parfin parfin lis pantianis dal… pantianâr la cantine. Insome… lu san propite ducj, e cumò tu lu sâs ancje tu, che Lupo Manarie al à cualchi fastidi dilunc des gnots di lune plene.
In particolâr, jessint za lui un Lupo Manarie, tes gnots di lune plene al devente un om. E pene che si stramude in om, a tachin i fastidis.
Tant par scomençâ al devente rabiôs. Si inrabie cun ducj!
Cul picôl dal taulin che i da une pache intun zenoli.
Cu la budiese che pacjifiche e fâs il so zirut ator dal lampadari.
Cu la moche dal cafè masse strente che nol rive a disvidâ.
Cul tapon de marmelade vidât masse mol che il vâs i fâs colâ.
Cu la cjicare dal lat, che i magle la tovuae.
Cul plat poiât masse sul ôr che i fâs colâ la fertaie.
E cul fûc che nol cjape, la television che no si impie
Il telecomant che nol zire e il telefonut che al zire come nie…
E al va a finîle che di gnervôs al tire la moca intor dal lampadari par copâ la budiese ma i pete su la television che e cole parsore de marmelade strucjade che e sclipigne su la fertaie pene cjapade sù che e sbrisse sul telecomant che al finìs dentri tal fûc che almancul chel, di gracie, si impie e lu bruse, insieme cu la tovuae maglade che cussì no je plui di lavâ. Almancul chel, va. Al reste che lui cu la lune plene si inrabie, si inrabie cence motîf, parfin cun Lupo Manarie stes, che cuant che al è un om nol cognòs, ma i dà fastidi dome sintî il non, e cussì si dîs tal spieli che al è un cjastron!
E no je finide parcè la gnot e je lungje, la lune e je plene ma no dure fin a matine. Il soreli al rive dongje e l’om rabiôs al torne a jessi Lupo Manarie, bon come simpri, che si cjale ator, cu la cjase sdrumade, ma propite nol capìs cui che al pues jessi stât. Ma no si inrabie, lui al è Lupo Manarie, e lecâ la fertaie cu la marmelade dal paviment, no i displâs par nuie!

di Rafaêl Serafin

Dissen dai Piçui Aiutants di Contecurte Jacum e Ricart

#1017

2 coments On Lupo Manarie e la lune plene

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît