Lupo Manarie e la sô Ferrari Volante

Lupo Manarie al decît di lâ a cjatâ il so amì il Cont Ecurte. (stacât eh)
Al monte in machine, nuie mancul che une Ferrari, e si invie sul dret par viodi trop svelte che e cor la sô super veture, ma rivant dongje Rivolt al scugne fermâsi a cjalâ par aiar lis Frecis (frecis tricolôr eh, no chês dai indians!) che a fasin lis lor acrobaziis; inmagât di chel spetacul a nol resist a la tentazion di provâ ancje lui a svualâ e alore ce ti cumbinie?!
Al jentre di straforo ta la base e si met insom da la piste, al tache a acelerâ e al partìs a dute bire, al moment just al frache un boton e a saltin fur dôs alis rossis e vie lui pa aiar!!!
Al prove a fâ cuatri gjerometis, al cjape gust e al pense ben di provâ ancje la “Foglia Morta” dal solist, savêso cuant che l’aereo al somee che a sedi come une fuee secje? A viodilu cussì al pâr che al sedi propit bulo, dome che nol veve cjalât il nivel dal carburant e tal biel mieç da la sô manovre al si inacuarç che il motôr lu à bandonat!
Par fortune te sô super veture al è un altri boton di sigurece che a lu bute fûr di colp a pene che lu tocje. Di bot e sclop Lupo Manarie di parsore dai nûi al tache a colâ jù plen di pôre tant che un gjat bagnât e al scomençe a berlâ “JUTORIIIIIII – JUTORIIIII!!!!!
(pensant tal stes moment che cheste peraule no la dopre plui nissun e lis sôs probabilitâts di sedi salvât cussì forsit no son avonde!)
La piste si viot simpri plui dongje e Lupo al sta par piardi lis sperancis, i passin denant dai voi dutis lis sôs aventuris, ma di colp si sint involuçâ di une cuarde fofe che a lu fâs sù come un salamp e po dopo lu strissine vie par la a finîle a pendolon, cu lis ongulis dai pîts ca petin par tiere. Dut inçussit e sbalotât al rive a stâ dret, e a pene che la cuarde fofe si disberdee, si cjale ator par capì sal è pardabon ancjemò vif!!!
“Cui mi aial salvât?? Ce cuarde ise cheste?”
Nol rive a capî ma juste in chel al cjale in sù e si inacuarç che la cuarde no je pardabon une cuarde ma dôs mostacjis lungjononis tacadis ta la muse di………… Barbe Zuan!!!!!
Ahì, bisugne propite fâ viodi barbe zuan, vino une imagjine di barbe zuan e da lis sôs mostacjis?
“Çondar!!!!! Ma ce crodevistu di fâ??? Sêstu mat???” i dis so barbe Zuan stant pojât su la ramascje dal pôl juste parsore di lui.
Voaltris o cognosseso barbe Zuan? Magari o vês un barbe che si clame Zuan?
Ben po, o vês di savê che Barbe Zuan, in dut chest timp che no vin sintût nuie di lui, al à lassât cressi i siei bafs par vinci il Guinness World Record come la bestie noturne cui bafs plui luncs dal mont e par fortune che a son ancje une vore resistents.

Il nestri Lupo Manarie al reste cui voi lusints e la bocjie spalancade un pôc pa la contentece e un pôc pa la maravee di viodi, no tant so barbe ma super baffi dal gjenar e al reste cence peraulis.
Juste in chel si sint un ton ca ju fas saltâ di pore ducj i doi e insiemit si zirin di scat viers dal rumôr: la veture si è sfracajade su la piste tra fûc e flamis e si sint dut un sclopetâ di fusetis ca sivilin tal cil, ormai scur e stelât. Lupo Manarie e Barbe Zuan come doi cocâi a alcin i voi e a viodin par aiar une scrite dute sflandorose e colorade che a dis fate cui fûcs de Ferrari:

Alore Lupo Manarie si met une çate sul cerneli cuasi disperât e al pense: “Sperìn che il gno amì Cont al sedi bielzà a cjalâ li stelis da la sô teraçe almancul al rivarà a viodi il regâl che o vevi preparât par lui cu la ferrari di fâ saltâ par aiar plene di fûcs artificiâi!”

di Jacum e Ricart Tiburzi
#1***