CorseCurte24 – Zurie, regolament in struc e spoiler!

O si ai 30 e a mancjin dome doi dîs ae CorseCurte24, la gare di contis curtis a teme che si davuelzarà dilunc dal 2024 e che e sarà un event di chei che si visarin a dilunc… e no cjacarìn dome di noaltris in Osterie. Di fat, al sarà un grant laboratori di scriture curte, ma vistût di divertiment e ande zuiarine. O sin daûr a meti adun une biele farie di leterature furlane e in sumis… viodêt voaltris se al è il câs di lassâ fûr il vuestri mus.

Se no vês vût timp di informâsi e no lu vês ancjemò, come prime robe ve ca, un pdf cul regolament in struc, di podê scjamâ e lei di presse par savê ce che al covente savût. E se no vês passion nancje di chel… benon, us basti savê che al 1 di Zenâr, insiemi al Bon Principi, o ricevarês une mail che us assegne un teme e che o vês di scrivi une conte di [edit] 2000 batudis (ma cui che al sta sot dai 1500 al cjape il bonus “curtissime” di 3 ponts).

Par partecipâ al baste vê sielt il non dal vuestri mus. E fin cumò o vin 20 mus in gare… i nons? Vino di spoilerâ? Ma sì, dai! I mus in gare fin cumò a son chescj: Derna, La Ciachegna, Mari de Gnot Nostrane, Fuschi, Secretariât, Nonio, Gato, Ippogrifo, Bultrik, Matungo, Ombre Grise, Brene Sfolmenade, 32, Chel di Cormons, Glorious Grene, Teresine la çuete, Incocalît, No Ancjemò, Daisy e Muspilli. I prins 18 a àn vût il premi fedeltât, ven a stâi un bonus di trê ponts. i ultins doi, un bonus di 2 ponts. Ma par cui che si iscrîf prime de fin dal 2023 al è inmò 1 pont di bonus.

A proposit, se nus vês scrit e no sês chi dentri… visait. Se il non nol è scrit just… visait. Se o volês cambiâlu… visait.

E o volêso savê cualchi altri spoiler? Vuê o sin bogns, e da rest, o vin cognossût Lupo Manarie e no podìn che jessi contents… Alore. Il teme pal mês di Zenâr che al vignarâ publicât sul sît al prin dal àn a saran… LIS FIGURIS DAL FOLCLÔR FURLAN, sedi di une volte, sedi ancje alc di plui moderni. Chest us capitarà come teme… preparaisi!

Par ce che rivuarde la zurie, doi agns indaûr, no savint ce che nus spietave, e jere colade su lis spalis di Carli Pup, Gianluca Franco e il nestri Ostîr. Che a jerin pôcs… E chest colp. Chest colp o pensìn in grant. O vin une zurie plui largje e di guscj e competencis diferntis. Carli Pup, il sclapeçocs de Ostarie, al è confermât, in bande di lui o vin zontât une cuote leterarie alte cun Donato Toffoli, che al devi vê let dut ce che si podeve lei, scrit par furlan; e dopo o vin Raffaella Corrias, mieze sarde e mieze furlane, colone di ROF e a sierâ, par vê ancje une cuote estere e plui zovine, Emma Cantarutti, che us leiarà di Parigji. Clare… l’Ostîr al è il cuint in zurie, ma us darà ancje une man prime di publicâ la conte, come simpri. Ce volêso di plui?

Us vin dite ancje masse. Cumò no us reste che spietâ i temis, se o sês za in corse, o iscrivisi, se o volês scrivi, o spietâ lis contis, se o volês lei, o… vonde. Ce altri.

Mandi a ducj e… bon finiment!

P.S.: E se o volês un ultin spoiler… ai 27 di Zenâr o varìn… UNE GRUESSE SORPRESE!

3 comments