Lis Aventuris di Lupo Manarie

Gjalarian, ai 29 di Dicembar 2023
Spaccio Raffl

Al somee pardabon impussibil che o vedin fat un spetacul par fruts e pûr… o vin fat un spetacul par fruts! O miôr… noaltris de ostarie o cencenavin, o vevin pôre di no cumbinâ, ma e je rivade une codebuie di chês che a sdrumin dut e no ti lassin sielzi… O fevelìn di lui, il meraviglioso, superlativo, galattico, fantastico… Lupo Manarie!
Eh sì, Lupo Manarie in cjar e vues al à cjapade in man la situazion, al à ordenât la senografie, i dissens, sielzût lis contis, messedadis come che i pareve a lui… e dentri al à ficjât ancje une sô aventure inedite. E il spetacul… al è saltât fûr une vore ben, tocje dîlu.

Ma magari al è miôr lâ par ordin e contâ di cheste serade che si è davuelte simpri dal Spaccio Raffl di Gjalarian, dulà che il prin nemì al jere il frêt ma par fortune o vin vût stuiis e clemence a parânus e anzit, nol pâr che nissun frut al vedi vût di cori par scjaldâsi. Anzit… a someavin une vore contents di viodi Lupo Manarie, presentât dal nestri Muini Stiefin in version Elf, e jentrât in sene cu la sô manarie potentissime. A savevin ducj bielzà il so non! Incredibil… e cun dut di chel, no content, al à ancje menaçât di mangjâ cualchi frut e ducj i gjai di Gjalarian. Ma cuiets… nol è sucedût nuie di dut chest. Anzit…

La serade e je tacade subite, in gracie ancje de senografie preparade de Gjatemarangule e soredut de sô abilitât di tignî abade il lôf, che al à vude une vore bisugne de assistente. A scomençâ de sielte dai letôrs! Eh sì, parcè che Lupo Manarie al voleve lei lui, lis storiis, ma lis cognosseve dome in lupese, e li inte stanzie nissun al cognosseve il lupese! Lui al à cirût di insegnâi, e a àn ancje imparât une peraule, ma nuie di fâ. Al è stât miôr che la prime storie – Le piume del drago di Sclaunicco – le leies il nestri Famei Checo, cun tant di dissens fats dal Ostîr (a proposit, chel no si è viodût in dute la serade! Raze di sflacjon…). Protagonist de storie… Lucio Panarie! E se vês voie di leile vait a discjamâ il pdf che o vin metût adun.

Po dopo e je stade la volte de storie scrite dai nestris Piçui Aiutants di Contecurte, Ricart e Jacum, che a àn contade in maniere magjistrâl la aventure di Lupo Manarie cu la sô Ferrari (che no va a finîle tant ben eh… la Ferrari, no la aventure). Il nestri Berlon si è divertît une vore a leile e businâ: Jutoriiiiii… Jutoriiiiii…

E dopo? E dopo e je stade la volte di une conte vecjonone (butade jù di Gianfranco Pellegrini), ma simpri gnove, ven a stâi chê dal Lôf sù pes scjalis, dulà che la Sartore Astrid e la Massarie Margherite a àn gjoldût e cjapade ancje pôre, cun Lupo Manarie che al voleve mangjâlis (ma pardabon eh!). Par fortune che la Massarie si è platade sot de cuvierte… Ma no avonde par no jessi tornade a clamâ a lei une altre conte maraveose, Nel paese dei mostri selvaggi, di Maurice Sendak, che cu lis movencis di Lupo Manarie sul sfont e je stade un spetacul. Che po… la Gjatemarangule e veve parfin metût i mostri selvaggi ator pe senografie, insiemi cun une vorone di altris mostris… di peluche!

Finide? Ma ce! Al è stât timp ancje pe conte “Flabe Spaziâl” scrite dal nestri Famei e lete di gnûf dal Berlon Michêl e ancje ca, i dissens dal Ostîr – che al podeve ben fâsi viodi, chel Salvadeat – a son stâts une vore preseâts. Anzit… Lupo Manarie al à inventât ancje un quiz par regalâju ai fruts, cussì almancul a finivin di piturâju, stant che a jerin mieç blancs. E jere ore di mirinde, lu savin, ma cualchidun nol jere passût di contis, e alore, su invît dal nestri Elf presentadôr, ve che la Sartore e à tirade fûr la storie di Barbe Bisat, la uniche storie di Nadâl de serade, che in sumis… i voleve. E dopo? E dopo fieste, vuicadis, cori come mats e soredut fotografiis cun Lupo Manarie, vere superstar de serade.

• La croniche de serade
• Lupo Manarie e la sô Ferrari volante
• Il vencul dal Famei
• La storie di Barbe Bisat
• Il post di reclam pal event

Lis fotografiis

I dissens des flabis