Anatomie di une conte

Google Meet, ai 6 e ai 10 di Mai dal 2021
Setemane de Culture Furlane

L’Ostîr za di tant al veve tal cjâf di meti adun un laboratori, un cors, alc di cheste fate, par stiçâ o insegnâ a scrivi (e lei) contis curtis par furlan. Ma no une robe complicade; une robe zuiarine e semplice, su lis fondis de narazion, che e des cualchi sugjestion a cui che al à gust di scrivi.

E cuant che i è rivade la propueste di meti adun alc pe Setemane de Culture Furlane de SFF, di bande dal Sportel pe Lenghe Furlane de Basse, al à pensât che e fos la ocasion juste, e cussì, cul jutori de Coghe Fuguline, al è stât inmaneât “Anatomie di une Conte”.

Il laboratori si è davuelzût su Meet, cuntune dozene di arlêfs e contecurtârs une vore preparâts e diligjents che a àn fat prime une lezion di teorie e dopo une di pratiche, leint e scrutinant lis contis dal concors Vôs de Basse, rivât ae sô cuarte edizion.

Inte prime part si è fevelât di fabula e intreccio, di struturis standard de narazion, di grâts di libertât intune conte. Inte seconde part si è lâts a viodi i aspiets di fonde des contis curtis: incipit, descrizions, dialics, mostrâ cence contâ, peraulis, sierade.

Ise lade ben? O disaressin propit di sì, viodint i esercizis fats da partecipants suntune filastrocje une vore innomenade che e je deventade conte. Achì no cjatarês la dispense furnide tal cors, che e je stade dade a ducj i partecipants, ma o viodarìn di tornâ a meti adun un cors simil, magari ancjemò plui smicjât su lis contis curtis de nestre ostarie. Ma intant, lait a lei “Pieri si volte” e gjoldeit de fantasie dai nestris contecurtârs!

Riferiments

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît