Pieri si volte

Al jere plui di un an che al veve chê sclope te schene. Al veve scomençât cence inacuarzisi. Lu fasevin ducj, lu disevin tai supermarcjâts, te radio, te television… Al à tacât tant che ducj, biel prest. I cjapave ogni dì plui timp: doi, trê, cinc, dîs e ancje vincj minûts. Cuntune gjonde segrete e scure, che nol faseve viodi a nissun.
Chel Març maledet la pôre e jere lade tes mans.
Laviti! A disevin. E lu faseve infondât intune frenesie colpevule finchè lis mans a jerin dutis rosis, cjaldis e sgonflis. Tes sachetis. Lis platave dai voi curiôs.
Dut al è saltât fûr chel dì che biel poiant lis mans tal scritori dal paron, al veve lassât une olme dal so sanc fresc. A volevin obleâlu a fâ visite al psicolic. Si scugnive voltâ puartament par fâ colâ chê sclope.
Lâ dal psicolic! Al jere miôr copâsi.
Ma lui al veve za capît. Al jere striât.
Jê no jere tant che lui si visave de strie dal paîs de sô none, simpri cui voi e il cjâf abàs, cun puce di gjats e jerbis, vistude dute di neri. Cheste e jere veramentri nere, cuntune baldorie di golarinis di mil colôrs, chês che le rivavin fin te vite, chestis sieradis ator il cuel di pensâ che no podeve rivâ a tirâ flât e neancje fevelâ. Ma jê e fevelave cun ducj e par ducj. Cui piçui canais che i corevin ator riduçants tant che riuts legris. Cun lui che al cjalave dut cence capî cuasit nuie. E cuntune gjaline blancje sore la cjadree dongje di jê.
– Fâmi viodi lis tôs mans, mi amor – e lui al veve slungjât lis mans, sot il cercli di lûs parsore de taule. La strie e veve cjapât la gjaline par fâle sentâ cun solenitât parsore lis mans.
Mi amor, no stâ a moviti cumò – e veve tirât fûr un curtìs grandon, cuissà se disot des golarinis.
Cence spietâ, lui si volte, fassint colâ la gjaline. Cuntun sun di sclopetade, al cole ancje il curtìs. Al à dome voi pe puarte sierade.
-Torne mi amor! Viot che o soi vegane, no mangji neancje i ûfs che e fâs la Blanquita! Torne, ti dîs! Al jere dut teatri, par fâti vuarî!
In salf tal mieç de strade, sot la lûs dal soreli, si cjale lis mans sporcjiis de porcarie de gjaline. Cun calme e indiference, Pieri al tache a cjaminâ, bielzà vuarît.

di Noemi Salva
#1096

Note: Conte jessude dal laboratori “Anatomie di une conte

1 coments On Pieri si volte

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît